«Ժամանակ» օրաթերթի և 1in.am կայքի լրագրող Սոնա Հարությունյանի դեմ դատական հայցը եզակի նախադեպ է:
Առաջին անգամ Հայաստանում Ֆեյսբուքում արված գրառումը հավասարեցվեց լրատվամիջոցում հրապարակված լրագրողական հոդվածին և հենց այդ կարգավիճակում էլ դատավճռի արժանացավ:
Սոնայի սոցցանցային գրառումը, որ News.am կայքի սեփականատիրոջ մասին էր, հարուցել էր News.am-ի զայրույթը, որին հաջորդեց դատական հայցը վիրավորանքի և զրպարտության մեղադրանքով:
«Դատարանը համարեց, որ ես պատշաճ ջանք չեմ գործադրել տեղեկությունը ստուգելու և Ֆեյսբուքում ստատուս գրելուց՝ ակտիվ հղումներ չեմ տվել սկզբնաղբյուրին»,- պատմում է Սոնան:
Դատարանը մասնակիորեն բավարարել է News.am-ի հայցադիմումը և պարտավորեցրել վճարել 50 հազար դրամ և հրապարակել հերքման տեքստը:
Սոնա Հարությունյանն ասում է, որ դատական համակարգում իրական քաոս է, և դատարանները, լսելով Ռոբերտ Քոչարյանի (News.am-ի ենթադրյալ սեփականատիրոջ) անունը, ի վիճակի չեն սթափ, իրավական դաշտում պատճառաբանված որոշում կայացնել:
Դատարանն ընդհանրապես չքննարկեց News.am-ի սեփականատիրոջ ով լինելու հարցը՝ հիմք ընդունելով միայն պետռեգիստրի փաստաթղթերը:
Սոնան դատական որոշումը օրինական չի համարում, բայց և վստահ է, որ սոցցանցերում լրագրողը միայն լրագրող չէ, քանի որ դա ավելի անկաշկանդ ու ազատ միջավայր է:
Գեղամ Վարդանյան
