Ապրիլի 28-ին, ժամը 16։00-ին Մեդիա նախաձեռնությունների կենտրոնում (Արշակունյաց 3ա, վերջին հարկ) կներկայացվի «Քովիդ-19-ի լուսաբանումը» թեմայով էլեկտրոնային հայերեն դասընթացը գործող և սկսնած լրագրողների, դասախոսների և թեմայով հետաքրքրված մասնագետների համար։

Հանդիպմանը կազմակերպիչները կներկայացնեն դասընթացի նպատակը, ուղղությունները, ակնկալվող արդյունքները։ Էլեկտրոնային դասընթացը ոչ միայն Covid-19-ի, այլև ընդհանրապես համաճարակների գրագետ և անվտանգ լուսաբանման թեմայով է։

Դասընթացը բաղկացած է 5 մոդուլներից, որոնցից յուրաքանչյուրն առանձին է իր ուղղվածությամբ, գործնական առաջադրանքներով, որոնք հիմնականում թեստերի ձևաչափով են և ստուգում են մասնակիցների տեղեկացվածությունը։

Դասընթացի ավարտին լրագրողները կծանոթանան․

• Covid-19-ին՝ որպես հանրային առողջապահական հիմնախնդիր, թե ինչպես կարելի է արձագանքել էթիկական և գործնական մարտահրավերներին համաճարակներ ու համավարակներ լուսաբանելիս,
• ինչպես Covid-19 ինֆոդեմիայի պայմաններում ստեղծել ճշգրիտ, ստուգված տեղեկություններ,
• Covid-19-ի դեմ պատվաստանյութերի ստեղծման հիմքում ընկած գիտությանը,
• իրենց դերին՝ որպես լրագրող, որը լուսաբանում է պատվաստանյութերի կարևորությունը հանրային առողջապահության համար։

Էլեկտրոնային դասընթացի մասնակիցը յուրաքանչյուր մոդուլն ավարտելիս ստանալու է վկայական։ Դասընթացի ամբողջական վկայականն ստանալու համար անհրաժեշտ է հաջողությամբ ավարտել դասընթացի բոլոր 5 մոդուլները։

Դասընթացին մասնակցելու համար հարկավոր է լրացնել հայտը։

Հաջողությամբ այն ավարտած մասնակիցների համար մայիսի 5-ին տեղի կունենա երկրորդ հանդիպումը՝ քննարկելու դասընթացի արդյունքները, էֆեկտիվությունը, խնդիրներն ու այն բարելավելու առաջարկները։ Դասընթացն ավարտած մասնակիցները կստանան խրախուսական նվերներ:

Յուրաքանչյուր հանդիպումը կտևի երկու ժամ։

Լրացուցիչ տեղեկությունների համար կարող եք դիմել Գայանե Ասրյանին 094 81 00 99 հեռախոսահամարով կամ գրել [email protected] էլեկտրոնային հասցեով։

Դասընթացը պատրաստել է Հայաստանի ամերիկյան համալսարանի Թրփանճեան առողջապահական գիտությունների ֆակուլտետի Ավետիսեան Օնանեան առողջապահական ծառայությունների հետազոտման և զարգացման կենտրոնը «Աջակցություն՝ կառավարելու կորոնավիրուսային հիվանդության և այլ վարակիչ հիվանդությունների բռնկումները Հայաստանում» ծրագրի շրջանակում՝ Թոմսոն հիմնադրամի (Thomson Foundation) հետ համագործակցությամբ։

Սույն դասընթացն ստեղծվել է Ամերիկայի ժողովրդի աջակցությամբ` ԱՄՆ Միջազգային զարգացման գործակալության (ԱՄՆ ՄԶԳ) միջոցով: Այստեղ արտահայտված տեսակետները և նյութի բովանդակությունը միմիայն հեղինակներինն են և պարտադիր չէ, որ արտահայտեն ԱՄՆ ՄԶԳ կամ ԱՄՆ կառավարության տեսակետները: