2021.06.26,

Ստուգված է

Եվրոպական խորհրդարանը հայ գերիների մասին նոր բանաձև չի ընդունել

author_posts/ophelia-simonyan
Օֆելյա Սիմոնյան

Լրագրող

Հունիսի 25-ին armjok.am-ի ֆեյսբուքյան էջը, որն ունի 95 790 հետևորդ, գրեց, որ Բրյուսելում 607 ձայնով ընդունվեց մի նախագիծ, որով Ադրբեջանին պարտադրվում է առանց որևէ նախապայմանի վերադարձնել բոլոր հայ ռազմագերիներին։ Լուրը վիրուսային արագությամբ սկսեց տարածվել ֆեյսբուքում, մասնավորապես Նիկոլ Փաշինյանին աջակցող ֆբ էջերում։

Իրականում տեղեկությունը հին է. Եվրոպական խորհրդարանը բանաձևն ընդունել էր դեռևս 2021-ի մայիսի 20-ին։ Այդ մասին գրել էր նաև ԱԺ պատգամավոր Նաիրա Զոհրաբյանը։ Նա տեղեկացրել էր, որ Եվրոպական խորհրդարանը 607 կողմ ձայնով ընդունեց բանաձև, որով պարտադրում է Ադրբեջանին առանց որևէ նախապայմանի ազատ արձակել հայ ռազմագերիներին և գերեվարված քաղաքացիական անձանց։

Կրկին տարածվող լուրը Զոհրաբյանի գրառման հատվածներից մեկն է։ Դրանից հետո նոր բանաձևի ընդունման մասին որևէ հայտարարություն չի եղել։ Ավելի վաղ՝ ապրիլի 19-ին, Եվրախորհրդի խորհրդարանական վեհաժողովում կայացել էր քվեարկություն, որի արդյունքում որոշվել էր լիագումար նստաշրջանի օրակարգում ընդգրկել Ադրբեջանում գտնվող «հայ ռազմագերիների, պահվող այլ անձանց և տեղահանված անձանց մասին» հարցը։

Մայիսի 20-ի բանաձևի ընդունումից անցել է ավելի քան մեկ ամիս, Հայաստանը դեռ պայքարում է Ադրբեջանում գտնվող ռազմագերիների վերադարձի համար։

Հունիսի 12-ին ՀՀ վարչապետի պաշտոնակատար Նիկոլ Փաշինյանը ֆեյսբուքյան գրառմամաբ հայտնեց, որ Հայաստան է վերադարձել Ադրբեջանում պահվող 15 ռազմագերի։ Կարևոր է, սակայն, որ ԵԽ այդ բանաձը չէ, որ էական ազդեցություն է ունեցել գերիների վերադարձի հարցում։ Բաքուն ռազմագերիներին Հայաստանին էր վերադարձրել ականապատ տարածքների քարտեզի դիմաց։ Այդ մասին նշվում էր Բաքվի պաշտոնական հայտարարության մեջ նաև։ Նիկոլ Փաշինյանը, մինչդեռ, պնդել էր` Երևանը ոչ թե փոխանակել է ականապատ տարածքների քարտեզները գերիների դիմաց, այլ` Ադրբեջանի ընդառաջ քայլին պատասխան քայլ արել։

Այս գործընթացում ակտիվ մասնակցություն է ունեցել Վրաստանի վարչապետ Իրակլի Ղարիբաշվիլիի։ Փոխանակումը տեղի է ունեցել Վրաստանի հետ Ադրբեջանի սահմանին:

«Նրանք ազատվել են […] Վրաստանի վարչապետ Իրակլի Ղարիբաշվիլիի և ԱՄՆ Եվրոպայի և Եվրասիայի հարցերով պետքարտուղարի օգնականի տեղակալ Ֆիլիպ Ռիկորի ակտիվ աջակցությամբ», – ասված էր Վրաստանի կառավարության հայտարարության մեջ: Նիկոլ Փաշինյանի մամուլի խոսնակ Մանե Գևորգյանը ևս գրել էր ԱՄՆ-ի և Վրաստանի միջնորդության մասին։

Գերիների քանակի մասին հստակ ինֆորմացիա դեռևս չկա։ Հանրային հեռուստատեսության եթերում նախընտրական բանավեճի ժամանակ Փաշինյանը հայտարարել էր՝ հայ գերիների ճշտված թիվը 60 է, չճշտվածներինը՝ 110։ 

Օֆելյա Սիմոնյան


Մեկնաբանել

Media.am-ի ընթերցողների մեկնաբանությունները հրապարակվում են մոդերացիայից հետո: Կոչ ենք անում մեր ընթերցողներին անանուն մեկնաբանություններ չթողնել: Միշտ հաճելի է իմանալ, թե ում հետ ես խոսում:

Media.am-ը չի հրապարակի զրպարտություն, վիրավորանք, սպառնալիք, ատելություն, կանխակալ վերաբերմունք, անպարկեշտ բառեր եւ արտահայտություններ պարունակող մեկնաբանությունները կամ անընդունելի համարվող այլ բովանդակություն:

Leave a Reply

Your email address will not be published. Required fields are marked *