Լրատվամիջոցները նախընտրական քարոզչությունն ակտիվորեն լուսաբանում էին դեռևս պաշտոնական քարոզարշավի մեկնարկից շատ առաջ և մասնավորապես՝ դրան նախորդող շաբաթվա ընթացքում, ինչը պայմանավորված է քաղաքական պայքարի սրությամբ և ընտրություններին մասնակցող քաղաքական ուժերի աննախադեպ քանակով։

Այս մասին նշվում է Երևանի մամուլի ակումբի կողմից ընտրությունների շրջանում ավանդաբար անցկացվող Հայաստանյան մեդիայի մշտադիտարկման առաջին փուլի՝ մայիսի 31- հունիսի 6-ի հաշվետվությունում։ 

Այս անգամ  ուսումնասիրվել են հայկական համազգային բոլոր 6 հեռուստաալիքների (Հայաստանի հանրային հեռուստաընկերության Առաջին ալիք, Ա-ԹԻՎԻ, «Արմենիա», «Երկիր Մեդիա», «Կենտրոն», «Շանթ») և Հայաստանի հանրային ռադիոյի աշխատանքը։

Այս ալիքներում հետազոտվել են  երեկոյան պրայմ-թայմին (18.00-00.00) հեռարձակվող լրատվական ծրագրի հիմնական թողարկումը, լրատվական-վերլուծական հաղորդումները և հասարակական-քաղաքական/բանավիճային հաղորդումները:

Հետազոտությունից պարզ է դառնում, որ նոր ստեղծված կամ ոչ այնքան հայտնի կուսակցություններն ու դաշիքները մեդիայի ուշադրությունից դուրս են մնացել։ 

Հանրային ուշադրության կենտրոնացումը երկու քաղաքական ուժերի՝ «Հայաստան» դաշինքի և «Քաղաքացիական պայմանագիր» կուսակցության նկատմամբ, անդրադարձել է նաև նրանց լուսաբանման վրա։ 

Եթե օրինակ «Հայաստան» դաշինիքին նշված լրատվամիջոցների կողմից  հատկացվել է մոտ 11 ժամ, իսկ  Քաղաքացիական պայմանագրին՝  վեց, ապա «Ազատական», «Ազատություն», «Ազգային օրակարգ»,«Համահայկական ազգային պետականություն» ,«Հայաստանի դեմոկրատական», «Հայաստանի եվրոպական» կուսակցություններին անդրադարձել են մասնակի և նրանց նվիրված եթերաժամանակը  կազմել է ընդամենն ութական վայրկյան։ 

Եթերաժամանակի հանրագումարային ծավալով առաջատարը «Հայաստան» դաշինքն է, իսկ անդրադարձների հաճախությամբ՝ «Քաղաքացիական պայմանագիրը»։

Իշխող «Քաղաքացիական պայմանագիր» կուսակցությունը առաջատար է նաև իր  մասին լրատվամիջոցներում բացասական հիշատակումների թվով՝ 66, որի գերակշիռ մասը՝ 40-ը Երկիր մեդիայի կողմից է արձանագրվել։  

Իսկ դրական հիշատակումների արժանացել են ընդամենը երկու անգամ՝ Հանրային հեռուստաընկերության  և Շանթի կողմից։ 

«Երկիր Մեդիան» երեկոյան պրայմ թայմի ժամանակ ընտրությունների թեմային հատկացված եթերաժամանակով գերազանցել է մյուս բոլոր հետազոտված հեռարձակողներին՝ միասին վերցրած։

«Հայաստան» դաշինիքի մասին մշտադիտարկվող լրատվամիջոցներում դրական և բացասական հիշատակումների քանակը գրեթե հավասար է՝ ութ դրական և ինը բացասական։ Մյուս կուսակցությունների ու դաշինքների մասին խոսվել է հիմնականում չեզոք դիրքերից։ 

Հենց այս երկու առաջատարների և ընտրապայքարի մասնակից մյուս 24-ի միջև խզումը  հետազոտության հեղինակներին թույլ չի տալիս տալիս խոսել պաշտոնական քարոզչությանը նախորդող շրջանում  քարոզարշավի հավասարակշռված լուսաբանման մասին։

Ինչպես լուսաբանեցին հունիսի 7-18-ի  նախընտրական քարոզարշավը նշված լրատվամիջոցները պարզ կդառնա Երևանի Մամուլի ակումբի կողմից իրականացվող մշտադիտարկման հաջորդ փուլի ամփոփման արդյունքում։

Մանե Գրիգորյան