Հեռուստատեսության և ռադիոյի հանձնաժողովը ներկայացրել է Հայաստանում 2019-ի ամենադիտված հաղորդումները: Ըստ վերլուծության, եթերում ամենաշատը դիտվում են ժամանցային հաղորդումներ, հեռուստասերիալներ, գեղարվեստական ֆիլմեր:

Ամենաքիչը դիտում են սպորտային և մանկական հաղորդումներ, վավերագրական ֆիլմեր:

Լրատվական հաղորդումների դիտումների համար մրցակցում են Արմենիա, Շանթ և Հանրային հեռուստաընկերությունները: Ամենադիտվածը Արմենիայի «Ժամն» է:

Ցածր դիտողականություն ունեն ԱՐ-ի, 5-րդ ալիքի, Նոր Հայաստանի լրատվական հաղորդումները:

Թոք շոուների և քաղաքական հաղորդումների հիմնական մատակարարը Հանրային հեռուստատեսությունն է, 10 լավագույններից 7-ը պատկանում է այս հեռուստաընկերությանը:

Հանրայինի «Հանրային քննարկում»-ն ու Ա-Թվ-ի «Կիսաբաց լուսամուտները» դիտողականությամբ մրցակից հաղորդումներ են:

Սպորտային իրադարձություններին ամենաշատը հետևում են Արմենիա և Շանթ հեռուստաալիքներում:

Տեղական արտադրության գեղարվեստական ֆիլմերով մեծ լսարան է ապահովում Արմենիա հեռուստաընկերությունը: Տեղական և արտասահմանյան հեռուստասերիալների հիմնական ցուցադրողները Արմենիան և Շանթն են:

Ընդ որում, տարբեր սերիալների դիտողականության միջև տարբերությունը մեծ չէ, բոլորն են դիտելի:

Նույն պատկերն է ժամանցային-հումորային հաղորդումների դեպքում:

Երաժշտական հաղորդումների առաջատարը Շանթն է, սակայն հաղորդումների դիտելիության բազմազանությամբ աչքի է ընկնում Արմենիան: Հանրայինի եվրատեսիլյան հաղորդումները ևս մեծ լսարան ունեին:

Խոհանոցային հաղորդումներն ամենաշատը դիտվում են Արմենիայի եթերում, թեև առաջատարը Շանթի «Մամայի եփածն ուրիշ է» հաղորդումն է:

Ամենամեծ ծավալով մանկական բովանդակությունը ստեղծում է Հանրայինը, թեև ամենադիտվածը Շանթի «Անբան հուռի»-ն է:

Գայանե Ասրյան