2020.02.17,

Նյուսրում

Գերման Ավագյանի հիշատակին

author_posts/nune-hakhverdyan
Նունե Հախվերդյան
twiter

Լրագրող, արվեստի քննադատ

Լուսանկարիչ Գերման Ավագյանի հետ ուրախ էր աշխատելն ու բարդ էր աշխատանքը համարել ավարտած:

Նա մարդ էր, որը մտածում էր շարքերով, շարունակական նախագծերով, շղթայական կապերով: Ինչ նախաձեռնում էր, անպայման ստացվում էր ակտիվ միջամտություն կյանքին ու մարդկային անտարբերությանն ուղղված փոքր քայլ:

Նրա լուսանկարչական շարքերը՝ սոցիալական խոցելի խավերի, հատուկ վերաբերմունքի արժանի երեխաների, պատերազմի հետքերը կրողների, արվեստի ներգործության և շատ այլ մտահղացումներ, պատմություններ էին, որոնց արժեքը Գերման Սվագյանի համար արձագանքն էր:

«Գոյություն ունի զգացմունքայնության շեմ, որն անցնելով` մարդը դադարում է ընկալել ու զգալ ցավը, վտանգը: Նրա համար ամեն ինչը միևնույն է դառնում»,- media.am-ին տված հարցազրույցում ասել էր նա:

Գերմանի համար միևնույն չէր շատ բան: Նա ուներ հազարավոր ընկերներ, գործընկերներ, զրուցակիցներ: Գիտեր Հայաստանում տեղի ունեցող ու սպասվելիք կարևոր նշանների մասին՝ վավերացնում էր դրանք ու իր շուրջը հավաքում մարդկանց:

Գերման Ավագյանի հետ ուրախ էր, քանի որ նա ինքն էր կապող օղակը մարդու ու իրադարձության, մարդու ու խնդրի, մարդու ու մեկ այլ մարդու միջև:

Իր լուսանկարների հերոսների հետ խոսում էր օրերով, տարբեր թեմաներից և միշտ կապ պահպանում նրանց հետ… եթե պետք էր: Նաև տարիներ անց:

Գերմանը լավ զգում էր, թե երբ է պետք:

Օրինակ, գրել լրագրողական սյունակ ֆոտոլրագրության խնդիրների մասին, առաջ քաշել էթիկական, հեղինակային իրավունքների պաշտպանության հարցերը: Երբ լռել ու երբ ակտիվ լինել: Երբ պարզապես խմել ընկերների հետ, և երբ նրանցից պահանջել միանալ հերթական շարքին:

Ընդ որում՝ ոչ միայն միանալ, այլև անել դա մեծ հաճույքով ու երկյուղով, որ հանկարծ կարևորը չֆրագմենտանա ու չկորչի:

Գերմանը վավերագրում էր իր ժամանակը՝ ամեն վայրկյան ու խորամանկ աչքերով ժպտալով ասում՝ դեռ ժամանակը չի, որ հրապարակեմ, հետո…

Նունե Հախվերդյան


Մեկնաբանել

Media.am-ի ընթերցողների մեկնաբանությունները հրապարակվում են մոդերացիայից հետո: Կոչ ենք անում մեր ընթերցողներին անանուն մեկնաբանություններ չթողնել: Միշտ հաճելի է իմանալ, թե ում հետ ես խոսում:

Media.am-ը չի հրապարակի զրպարտություն, վիրավորանք, սպառնալիք, ատելություն, կանխակալ վերաբերմունք, անպարկեշտ բառեր եւ արտահայտություններ պարունակող մեկնաբանությունները կամ անընդունելի համարվող այլ բովանդակություն:

Leave a Reply

Your email address will not be published. Required fields are marked *