2016.01.15,

Նյուսրում

Ֆեյսբուքյան գրառումները լրագրողին աշխատանքից ազատելու պատճառ

author_posts/anna-barseghyan
Աննա Բարսեղյան
twiterfacebook

Լրագրող

«Հայոց աշխարհ» օրաթերթի լրագրող Կիմա Եղիազարյանին ազատել են աշխատանքից, ինչպես լրագրողն է նշում՝ իր ֆեյսբուքյան գրառումների պատճառով: Լրագրողը մարտի 30-ին Ֆեյսբուքյան իր էջում գրել է. «Երեկ ինձ ազատեցին աշխատանքից: 10 րոպեում: Պատճառը ՖԲ-ի իմ ստատուսներն ու մեկնաբանություններն են: Համարձակվել եմ սեփական կարծիք արտահայտել: Պատկերացնու՞մ եք»:

 

«Հայոց աշխարհ» օրաթերթի գլխավոր խմբագիր Գագիկ Մկրտչյանը «Հայկական ժամանակ»-ին մեկնաբանել է լրագրողին աշխատանքից ազատելը՝ «Յուրաքանչյուր թերթ ունի իր քաղաքականությունը եւ նախապատմությունը: Յուրաքանչյուր լրագրողի գործունեությունը պետք է տեղավորվի այդ քաղաքականության մեջ: Չի կարելի օրվա մի կեսը գրել ըստ թերթի ուղղվածության, մյուս կեսը` սոցցանցերում` դրա հակառակը: Դա վտանգավոր է նաեւ լրագրողի տեխնիկայի համար: Կիմա Եղիազարյանինը այդ տարբերակն էր: Էստեղ խոսքի ազատությունը սահմանափակելու նպատակ չկա»:

 

Ինչպիսի՞ն պետք է լինի լրագրողի վարքագիծը սոցիալական մեդիայում. մեկնաբանում են «Մեդիամաքսի» եւ «Առավոտի» խմբագիրները:

Արամ Աբրահամյան

«Առավոտ» օրաթերթի խմբագիր

 

Ինձ, օրինակ, չի հուզում, թե ինչ են «Առավոտի» լրագրողները գրում Ֆեյսբուքում, ինչին է դա հակասում կամ ինչին է համընկնում, իրենց անձնական գործն է:

 

Նրանք ոչ միայն սոցցանցում, այլեւ «Առավոտում» կարող են գրել իրենց կարծիքը, միայն թե թերթում դա չպիտի լինի ռեպորտաժի, հարցազրույցի մեջ: Մեկնաբանության մեջ՝ խնդրեմ:

Դավիթ Ալավերդյան

Մեդիամաքսի գլխավոր խմբագիր

 

Ճիշտն ասած՝ տեղյակ չեմ, թե ինչ հիմնավորմամբ է լրագրողն ազատվել աշխատանքից, բայց եթե դիտարկենք ժուռնալիստական էթիկայի տեսակետից եւ վերցնենք միջազգային փորձը, ապա պետք է նշեմ, որ աշխարհի առաջատար լրատվամիջոցները եւս չեն քաջալերում իրենց լրագրողներին, երբ նրանք իրենց քաղաքական ուղղվածությանը հակասող մեկնաբանություններ են թողնում սոցիալական ցանցերում կամ այլ լրատվամիջոցներում:

 

Նույնիսկ հայտնի են դեպքեր, երբ աշխատանքից ազատել են այն լրագրողներին, ովքեր ոչ աշխատանքային ժամերին, շաբաթ-կիրակի, ասենք, գնացել մասնակցել են միտինգի կամ ինչ-որ միջոցառման:

 

Լրատվամիջոցի փաստարկը եղել է այն, որ եթե մարդ գրում է մի թեմայով եւ հետո գնում մասնակցում է այդ միջոցառմանը, ապա հետագայում չի կարող օբյեկտիվ լինել այն իրադարձության հանդեպ, որը նա լուսաբանում է:

 

Այս պարագայում եւս որոշակի հակասություն կա գործողությունների մեջ, որոնք լրագրողն ի պաշտոնե կատարում է թերթում, եւ այն մեկնաբանությունների, որոնք նա թողնում է ֆեյսբուքյան էջում, որովհետեւ նրա ընթերցողները կարող են չհասկանալ՝ արդյոք լրագրողն արտահայտում է լրատվամիջոցի՞ պաշտոնական դիրքորոշումը, թե՞ դա միայն իր անձնական տեսակետն է, որը որեւէ կերպ չի համապատասխանում լրատվամիջոցի տեսակետին:

 

Այն դեպքում, երբ լրագրողը չի կիսում լրատվամիջոցի քաղաքականությունը, ուղղվածությունը, տեսակետները, նախընտրելի տարբերակ է, որ ինքը հրաժարականի դիմում ներկայացնի եւ տեղափոխվի մեկ այլ լրատվամիջոց, որի տեսակետներն իրեն հոգեհարազատ են:


Մեկնաբանել

Media.am-ի ընթերցողների մեկնաբանությունները հրապարակվում են մոդերացիայից հետո: Կոչ ենք անում մեր ընթերցողներին անանուն մեկնաբանություններ չթողնել: Միշտ հաճելի է իմանալ, թե ում հետ ես խոսում:

Media.am-ը չի հրապարակի զրպարտություն, վիրավորանք, սպառնալիք, ատելություն, կանխակալ վերաբերմունք, անպարկեշտ բառեր եւ արտահայտություններ պարունակող մեկնաբանությունները կամ անընդունելի համարվող այլ բովանդակություն:

Leave a Reply

Your email address will not be published. Required fields are marked *