Համաշխարհային մեդիան բազմակողմանի եւ լայնորեն լուսաբանեց Հայոց ցեղասպանության 100-րդ տարելիցը: Հայաստանի եւ ցեղասպանության թեմայի նկատմամբ միջազգային մեդիա կորպորացիաների հետաքրքրությունը սկսվել էր դեռեւս ապրիլի սկզբին՝ Քարդաշյանների ընտանիքի այցով:

Այն շարունակվեց Վատիկանում եկեղեցական արարողության ժամանակ Հռոմի պապ Ֆրանցիսկոսի` Հայոց ցեղասպանության մասին խոսքով եւ Թուրքիայի` դրան հետեւած արձագանքով:

Ապրիլի 23-ին System Of A Down-ի երեւանյան համերգը, Բարաք Օբամայի ուղերձը, հետո ապրիլի 24-ի ոգեկոչման ու հիշատակի արարողությունները` Պուտինի եւ Օլանդի մասնակցությամբ, համաշխարհային մեդիայի՝ հայկական  թեմայի նկատմաբ հետաքրքրության կիզակետն էին:

The Guardian-ն ու The New York Times-ը Հայոց ցեղասպանության թեմային հատուկ անդրադարձ կատարեցին: Այս թերթերը լսարանին նախապես խնդրել էին ուղարկել իրենց պատմությունները եւ դրանց հիման վրա ազդեցիկ մուլտիմեդիա հոդվածներ ներկայացրին լսարանին:

Ցեղասպանության թեմայով հոդվածները բազմալեզու էին ու տարբեր կողմերից էին ներկայացնում խնդիրը՝ օրվա իրադարձություններ, պատմական փաստեր, վերապրածների վկայություններ:

Google-ի որոնման էջը Հայաստանից այցելուների համար Հայոց ցեղասպանության հիշատակի օրը սեւ ժապավեն էր տեղադրել: Իսկ սոցիալական մեդիայի համաշխարհային առաջատարներից Reddit-ը, որ Հայաստանում գրեթե տարածում չունի, իր լոգոյի հետեւում Հայաստանի եռագույնն էր տեղադրել:

Արդեն ապրիլի 25-ին Google News-ի գլխավոր նորությունների բաժնում «Armenian Genocide»-ն էր, ընդ որում` ավելի առաջատար դիրքերում, քան նույն ժամանակահատվածում Թուրքիայում իրականացվող «Gallipoli Campaign»-ը:

Գեղամ Վարդանյան