«Հայկական Ժամանակի» հրապարակումը մշակույթի նախարարության բյուջեից պետական ու մասնավոր լրատվամիջոցներին հատկացված ֆինանսավորման մասին որակվեց որպես սկանդալային։
Թեմայի մասին զրուցում ենք մշակույթի նախարարության գրական ծրագրերի համակարգող Արմեն Սարգսյանի հետ, որը զբաղվել է նաև մեդիայի աջակության խնդիրներով ու վստահեցնում է, որ ֆինանսավորումը տեղի է ունեցել նախարարության չափորոշիչների համաձայն:
Նա կարծում է, որ ոչ պետական մամուլի ֆինասավորումը պետք է մի քանի անգամ բազմապատկվի, որպեսզի տպագիր և էլեկտրոնային մամուլը կարողանան որակյալ բովանդակություն ստեղծել:
Արմեն Սարգսյանը համոզված է, որ նախարարության օգնությունը չի կարելի համարել լրատվամիջոցի վրա ազդելու փորձ:
Գրադարանի դարակում
Այսօր փողերը հաշվել կարողանալը կարևոր է ցանկացած լրագրողի համար: Օրինակ, այս կամ այն հիմնարկի եկամուտները: Պետեկամուտների կոմիտեն եռամսյակը մեկ հրապարակում է Հայաստանի հազար խոշոր հարկատուների ցուցակը։ Բայց կայքում կողմնորոշվելը բարդ է, քանի որ բացվում է անհարմար տեսքի հազար տողանի էքսել ֆայլ։
Խոշոր ընկերությունների վճարած հարկերին հետևել կարելի է harkatu.am կայքով։ Այստեղ Հայաստանի խոշոր հարկատուների մասին տեղեկությունը հարմար ու որոնելի է։ Յուրաքանչյուր ընկերության մասին ֆինանսական տվյալները դասավորված են ըստ տարիների ու հարկատեսակների։
Այս կայքը պետական չէ, այն ստեղծել է տեղեկատվական տեխնոլոգիաների ոլորտում աշխատող SFL ընկերությունը՝ օգտագործելով բաց տվյալները։ Ծրագրավորողներն ուղղակի մտածել են հանրության ու լրագրողների մասին՝ հեշտացնելով որոնումները:
Գեղամ Վարդանյան
