«Սիվիլնեթ»-ը դատական գործընթաց է սկսում Հայաստանի կառավարության աշխատակազմի դեմ։ Լրատվամիջոցի շահերը դատարանում օգնի ներկայացնել «Թրանսփարենսի ինթերնեշնլ»-ի իրավաբանական խումբը։ Հայցը վարույթ է ընդունվել, առաջին նիստը նշանակված է մայիսի 3-ին։
«Սիվիլնեթ»-ի լրագրող Մկրտիչ Կարապետյանը հարցում է ուղարկել ՀՀ Կառավարության աշխատակազմ Զանգեզուրի պղնձամոլիբդենային կոմբինատի (ԶՊՄԿ) բաժնետոմսերի 15 տոկոսը նվիրատվության պայմանագիրը ստանալու համար։
Գործադիրը չի հանրայնացրել պայմանագիրը պատճառաբանելով, որ այն պարունակում է առևտրային գաղտնիք։
Լրագրողն ասում է, որ չի կարող պետական մասնաբաժնին հետ կապված տեղեկությունները առևտրային գաղտնիք համարվել․ «Ավելին նշում են, որ հենց այդ պայմանագրով է որոշվել, որ այն պետք է գաղտնի մնա։ Բայց մենք իրավունք ունե՞նք չէ հասկանալու ի՞նչ պարտավորություններ ունի կառավարությունը, գուցե մեկ տարի հետո նվիրաբերում է մի ուրիշ կողմի»։
Ըստ նրա, պայմանագրով գաղտնիության հարցը կասկածների տեղիք է տալիս, քանի որ ընկերությունը Հայաստանի ընդերքը շահագործող խոշորագույն ընկերություններից է, խոշոր հարկատու է, և այս գործարքը պետք է թափանցիկ լինի հանրության համար։
Մարդկանց համար դեռևս պարզ չէ, թե ի՞նչ պայմանավորվածության արդյունքում Զանգեզուրի պղնձամոլիբդենային կոմբինատի բաժնետերը որոշեց կառավարությանը նման շռայլ նվիրաբերություն արել։
Փաստացի 2021թ-ից Հայաստանի կառավարությունը պղնձամոլիբդենային կոմբինատի համասեփականատեր է։ Այս բաժնեմասը կառավարությանը նվիրաբերել է «Արդյունաբերական ընկերություն» բաժնետիրական ընկերությունը, որի մասին պետական ռեգիստրում տեղեկություններ չկան։
Այն «Գեոպրոմայնինգ Արմենիային» պատկանող ընկերություն է, որը 2021-ի սեպտեմբերի 30-ին ձեռք էր բերել ԶՊՄԿ-ի 60 տոկոսը։
Վերջերս գործադիրը կառավարման արդյունավետության բարձրացման նպատակով իր բաժնեմասը կառավարման է հանձնել «Հայաստանի պետական հետաքրքրությունների ֆոնդ» ընկերությանը։
Ավելի վաղ media.am-ի հետ հարցազրույցում տնտեսագետ Հայկազ Ֆանյանն ասել էր, որ 2022թ-ին տնտեսական թեմաներով հետաքրքրված լրագրողները լավ կլինի ուշադրության կենտրոնում պահեն Զանգեզուրի պղնձամոլիբդենային կոմբինատի շուրջ զարգացումները։
Դատական նիստերը լինելու են դռնբաց։
Գայանե Ասրյան
Մեկնաբանել
Media.am-ի ընթերցողների մեկնաբանությունները հրապարակվում են մոդերացիայից հետո: Կոչ ենք անում մեր ընթերցողներին անանուն մեկնաբանություններ չթողնել: Միշտ հաճելի է իմանալ, թե ում հետ ես խոսում:
Media.am-ը չի հրապարակի զրպարտություն, վիրավորանք, սպառնալիք, ատելություն, կանխակալ վերաբերմունք, անպարկեշտ բառեր եւ արտահայտություններ պարունակող մեկնաբանությունները կամ անընդունելի համարվող այլ բովանդակություն: