2019.09.23,

Նյուսրում

Նոր չափորոշիչներ՝ պաշտպանելու անչափահասներին եթերից

author_posts/gayane-asryan
Գայանե Ասրյան
facebook

Լրագրող

Հեռուստատեսության և ռադիոյի հանձնաժողովը անչափահասներին վնասող բովանդակությունը կանխելու համար նոր չափորոշիչներ է մշակել:

«Յուրաքանչյուր երեխա պետք է պաշտպանված լինի ցանկացած իրավիճակում, նրա շահերը, անվտանգությունը պետք է գերակա լինեն խմբագրական ցանկացած պահանջների հանդեպ»,-ասված է փաստաթղթում:

ՀՌՀ նախագահ Տիգրան Հակոբյանի կարծիքով, անչափահասների առողջության, մտավոր և ֆիզիկական զարգացման, դաստիարակության վրա ազդող բովանդակությունը դժվար չափելի են, իսկ եղած կարգավորումները վերացական, որոնք տարատեսակ մեկնաբանության հնարավորություն են տալիս: 

Շատ երկրներում, ըստ Հակոբյանի, փորձագիտական գնահատական տալիս են անկախ մասնագիտական կառույցները: Մինչև չափորոշիչների մշակումը, հանձնաժողովը քննարկումներ է նախաձեռնել շահագրգիռ կողմերի հետ և մի քանի հասարակական կազմակերպությունների առաջարկներ ներառել այնտեղ:

«Ուզում ենք եթերում նվազեցնել անչափահասների համար վտանգ ներկայացնող բովանդակությունը, բայց մյուս կողմից շատ չմիջամտել հեռուստաընկերությունների եթերային քաղաքականությանը: Համաշխարհային ճանաչում ունեցող բազմաթիվ ֆիլմեր և հաղորդումներ այս պահին կարելի է հիշել, որտեղ կան բռնություն, սարսափ տարածող տեսարաններ»,-ասում է ՀՌՀ նախագահը: 

Նրա խոսքով, վերջին տարվա ընթացքում մի շարք տուգանքներ են կիրառվել, սակայն իրենց խնդիրը ոչ թե պատժելն է, այլ օրենսդրական, նորմատիվային ակտերով դաշտը կարգավորելը: 

Հեռուստաընկերություններն, ըստ հանձնաժողովի նախագահի, ծանոթացել են չափորոշիչների հետ և առարկություններ չեն ունեցել. «Նրանք սկզբում լռում են, սակայն հետո կարող են պատժամիջոցը բողոքարկել, խնդիրը մինչև դատարան հասցնել»:

Մարդու իրավունքների պաշտպանի գրասենյակը քաղաքացիներից եթերի հետ կապված բազմաթիվ բողոքներ է ստանում: 

Աշխատակազմի հետազոտական և կրթական կենտրոնի ներկայացուցիչ Տաթևիկ Մանուկյանն ասում է, որ առաջարկել են ՀՌՀ-ին որոշ կարգավորումներ ավելացնել չափանիշների մեջ՝ հիմք ընդունելով միջազգային հաջողված փորձը:

«Սեռական բնույթի գործողությունները եթերում սահմանափակելիս, հստակեցնում ենք, որ պետք է բացառել նաև դրանց մասին խոսակցությունները: Նույնը բռնության տեսարանների դեպքում, պետք չէ ողջունել կամ քարոզել այն»,-ասում է ՄԻՊ աշխատակիցը:

Եթերում անչափահասների իրավունքների խախտման դեպքերն ուսումնասիրելով, կառույցը եկել է այն կարծիքին, որ պետք է ավելի հստակ կարգավորումներ լինեն, որպեսզի հնարավոր չլինի դրանք շրջանցել: 

Սցենարիստ Հայկ Մկրտչյանն ասում է, որ հեռուստաընկերություններն իրենց առջև պահանջ են դնում գրել մասսայական, հումարային և զվարճալի սցենարներ, որպեսզի ապահովեն մեծ դիտողականություն:

«Նոր չափորոշիչները կօգնեն սցենարիստներին դուրս գալ իրենց կաղապարներից, լայն մտածել և ավելի լավ բովանդակություն ստեղծել: Պարզապես կարևոր է, որ խաղի կանոններն բոլորի համար հավասարապես ընդունելի լինեն»,-ասում է Հայկը:

Ըստ Հայկի հեռուստաընկերություններն էլ իրենց հերթին կարող են վերապատրաստեն իրենց սցենարիստներին. «Կամաց-կամաց լսարանը կսկսի դիտել, ընդունել և գնահատել արտադրանքն առանց հայհոյանքների, բռնության, բաց տեսարանների ցուցադրման»:

Գայանե Ասրյան


Մեկնաբանել

Media.am-ի ընթերցողների մեկնաբանությունները հրապարակվում են մոդերացիայից հետո: Կոչ ենք անում մեր ընթերցողներին անանուն մեկնաբանություններ չթողնել: Միշտ հաճելի է իմանալ, թե ում հետ ես խոսում:

Media.am-ը չի հրապարակի զրպարտություն, վիրավորանք, սպառնալիք, ատելություն, կանխակալ վերաբերմունք, անպարկեշտ բառեր եւ արտահայտություններ պարունակող մեկնաբանությունները կամ անընդունելի համարվող այլ բովանդակություն:

Leave a Reply

Your email address will not be published. Required fields are marked *