Խոշոր մեդիա կազմակերպությունները սոցիալական մեդիային ինտեգրվելուն զուգահեռ իրենց խմբագրությունների համար սոցիալական մեդիայի ուղեցույցներ են մշակել, որոնք կարգավորում են լրագրողի գործունեությունը սոցիալական ցանցերում եւ բլոգներում:

Washington Post-ի սոցիալական մեդիայի ուղեցույցի համաձայն՝ լրագրողները թե՛ մասնագիտական, թե՛ անձնական նպատակներով Facebook, Twitter, LinkedIn եւ այլ սոցիալական ցանցեր օգտագործելիս պետք է պաշտպանեն իրենց մասնագիտական ամբողջությունը եւ հիշեն, որ իրենց վարած սոցիալական մեդիա հաշիվները ազդում են Washington Post-ի խմբագրության հեղինակության եւ արժանահավատության վրա:

«Washington Post-ի լրագրողները պետք է ձեռնպահ մնան գրելուց, թվիթելուց կամ տեղադրելուց որեւէ բան (ներառյալ՝ լուսանկարներ եւ տեսանյութեր), որը կարող է ընկալվել որպես քաղաքական, ռասսայական, սեռական, կրոնական կամ այլ կողմնակալության եւ նախապատվության արտացոլում: Washington Post-ի լրագրողները պետք է գիտակցեն, որ սոցիալական ցանցերում նրանց հետ կապված ցանկացած բովանդակություն համարժեք է նրան, ինչը հայտնվում է թերթում կամ կայքում այդ լրագրողների հեղինակությամբ:

Խմբագիրների ամերիկյան կազմակերպությունը՝ ASNE-ն, որին անդամագրված են ամերիկյան մի շարք մեդիա կազմակերպությունների խմբագիրներ, պրոդյուսերներ եւ տնօրեններ, 2011 թվականին հրատարակել է «Սոցիալական մեդիայի 10 լավագույն փորձերը» ուղեցույցը, որտեղ ներկայացված են տարբեր մեդիա կազմակերպությունների սոցիալական մեդիա քաղաքականությունը:

Bloomberg-ի սոցիալական մեդիայի ուղեցույցի համաձայն՝ լրագրողները չպետք է սոցիալական ցանցերն օգտագործեն՝ քաղաքական կարծիքներ արտահայտելու կամ կոնկրետ խնդրի կամ օրակարգի անունից հանդես գալու համար:

«Գրառումները երբեք չպետք է արտահայտեն կողմնակալություն՝ կապված ռասայի, սեռի, կրոնի կամ ազգության հետ»,- նշված է ուղեցույցում:

Los Angeles Times-ի սոցիալական մեդիայի ուղեցույցը լրագրողներին զգուշացնում է հաշվի առնել, որ իրենց մասնագիտական եւ անձնական կյանքը կմիաձուլվեն օնլայն՝ անկախ նրանից, թե որքան խնամքով են նրանք առանձնացրել դրանք:

Reuters-ի սոցիալական մեդիա քաղաքականության համաձայն՝ լրագրողները պետք է սոցիալական մեդիայում երկու առանձին հաշիվ ունենան:

«Եթե դուք օգտագործում եք սոցիալական ցանցերը մասնագիտական եւ անձնական նպատակներով, ապա ունեցեք երկու առանձին հաշիվ: Օնլայն աշխարհում անձնականն ու մասնագիտականը գնալով ավելի են միահյուսվում, բայց դուք պետք է պահպանեք ձեր մասնագիտական դեմքը, պարզ ասած՝ դուք պետք է որոշակի չափանիշներ կիրառեք սոցիալական մեդիան մասնագիտորեն օգտագործելու ժամանակ, որոնք կտարբերվեն ձեր անհատական հաշիվը օգտագործելուց»,- գրված է Reuters-ի սոցիալական մեդիայի ուղեցույցում:

Աննա Բարսեղյան