2015.12.03,

Քննադատ

Նախագահի ծավալուն հարցազրույցը. սա էր հրատապ լուրը

Կասկածներ են առաջանում, թե գրաքննության խնդիր կա, նույնիսկ եթե հավաքվածների մեջ բոլորը «վստահելի» լրատվամիջոցների ներկայացուցիչներ են

Երեկ գիշեր մի շարք լրատվամիջոցներ տեղեկություն տարածեցին, որ նախագահ Սերժ Սարգսյանը դեկտեմբերի 2-ի երեկոյան ծավալուն հարցազրույց է տվել հեռուստաընկերությունների ներկայացուցիչներին, խոսել Սահմանադրության փոփոխությունների և մայրաքաղաքում վերջերս իրականացված հատուկ գործողությունների մասին:

Եթե նախագահի՝ հասարակայնության և տեղեկատվության միջոցների հետ կապերի վարչության պաշտոնական հաղորդագրությունը չլիներ, հարցազրույցին չմասնակցած լրատվամիջոցներն այս տեղեկությունն էլ, թերևս, չէին ունենա ու չէին տարածի: Չնայած պրոֆեսիոնալ լրագրության համար սա ամենևին էլ լուր չէ. լուրի դետալ է:

Հայաստանի նախագահի ասուլիսների ու հարցազրույցների դեպքում ավանդույթ է դառնում՝ նախ պաշտոնական հաղորդագրությունը:

Երբեմն նույն ավանդույթի ուժով նախ տարածվում է հարցուպատասխանի՝ պաշտոնական սղագրությունը: Իսկ նախագահի հնչեցրած որևէ կարևոր միտք մինչ այդ չի հրապարակվում: Իսկ եթե հանկարծ հրապարակվի, որքան էլ ապշելու բան է, կարող է դիտվել ոչ թե որպես լրագրողական պրոֆեսիոնալ մոտեցում, այլ արտահոսքի, դավաճանության պես մի բան:

Այսպիսի մոտեցումը երկրորդ պլան է մղել շատ ավելի կարևոր երկու հարց՝ ինչու՞ Հայաստանի նախագահն ասուլիսի չի հրավիրում առավել ընդարձակ ընդգրկմամբ լրատվամիջոցների ներկայացուցիչների, և ինչու՞ Հայաստանի նախագահը կամ նրա խոսնակը պարբերական ճեպազրույցների ավանդույթ չունեն. թեկուզ՝ ոչ շատ հաճախակի:

Իսկ հարցազրույցի մասնակիցնե՞րը:

Ի՞նչ են անում նման դեպքերում պրոֆեսիոնալ լրատվամիջոցներն աշխարհում: Հատկապես եթե նախագահը կամ նրա խոսնակը պարբերական ճեպազրույցների և լրագրողների հետ այլ ձևաչափի հանդիպումների ավանդույթ չունեն: Հարցազրույցի, այսպես ասած՝ թանաքը չչորացած, տեսագրված նյութին դեռ նույնիսկ չդիպած, փորձելով մեկը-մյուսից առաջ ընկնել, նրանք շատ շտապ, հրատապ, գլխապատառ տարածում են առնվազն ամենակարևոր միտքը, ամենահետաքրքիր կարծիքը, ամենաանսպասելի մտադրությունը, որը հանդիպմանը հնչեցրել է պաշտոնյան:

Հարցազրույցի հաջորդ օրվա առավոտյան անգամ այս թեմայով լռությունը խախտեց դարձյալ միմիայն նույն կեսլուրը՝ նախագահը ծավալուն հարցազրույց է տվել այսինչ թեմաներով:

Ինչպե՞ս է, որ չի պայթում մասնակից հեռուստաընկերությունների պրոֆեսիոնալ համբերությունը. նման դեպքերում լրատվամիջոցներին պետք է որ կրծի՝ ժամեր չեմ ասում, րոպեներ առաջ նյութը հեռարձակելու անհամբերությունը:

Հակառակ դեպքում, կասկածներ են առաջանում, թե գրաքննության խնդիր կա, նույնիսկ եթե հավաքվածների մեջ բոլորը «վստահելի» լրատվամիջոցների ներկայացուցիչներ են եղել: Ավելի հեռուն գնացող կասկածներ են ծնվում՝ արդյո՞ք նույն վայրում մոնտաժված, բայց իրարից մի քիչ տարբեր սյուժեներ չենք դիտելու:

Պաշտոնական նույն աղբյուրի տարածած լուսանկարներից դատելով՝ «հեռուստաընկերությունների ներկայացուցիչների» մեջ պրոֆեսիոնալ առումով շատ հարգարժան դեմքեր կան, որոնք ունեն նաև լրատվական իրենց հարթակները: Հասկանալի է, թե ինչ մեծ կռիվ կա նրանց հոգում: Պրոֆեսիոնալ անհամբերության նույն կռիվը, որ կարևոր հարցազրույցից հետո գոնե մեկ տող իսկական լուր չեն հաղորդել: Գոնե նրանց պրոֆեսիոնալիզմը խնայեին:

Թե չէ, տեղեկությունը, որ նախագահը ծավալուն հարցազրույց է տվել, բացարձակապես լուր չէ: Լավագույն դեպքում, մոդերացիա է՝ հաղորդավարի բացման խոսք: Չնայած պրոֆեսիոնալ մոդերատորը երբեք կարևոր պաշտոնյայի հարցազրույցի շուրջ անդրադարձը չի բացի տեղեկությամբ, թե պաշտոնյան հարցազրույց է տվել:

Հ.Գ. Այս հոդվածը պատրաստ էր, երբ նախագահի պաշտոնական կայքում հայտնվեց նշված հարցազրույցի ծավալուն սղագրությունը: Դա նույնպես պաշտոնական հաղորդագրություն է, և այն, վերջին հաշվով, նախորդեց հեռուստատեսություններում պրոֆեսիոնալ լրատվական անդրադարձներին: Չեն խնայում, էլի, գոնե պրոֆեսիոնալներին:

Ռուզան Խաչատրյան

Սյունակում արտահայտված մտքերը պատկանում են հեղինակին եւ կարող են չհամընկնել media.am-ի տեսակետների հետ:


Մեկնաբանել

Media.am-ի ընթերցողների մեկնաբանությունները հրապարակվում են մոդերացիայից հետո: Կոչ ենք անում մեր ընթերցողներին անանուն մեկնաբանություններ չթողնել: Միշտ հաճելի է իմանալ, թե ում հետ ես խոսում:

Media.am-ը չի հրապարակի զրպարտություն, վիրավորանք, սպառնալիք, ատելություն, կանխակալ վերաբերմունք, անպարկեշտ բառեր եւ արտահայտություններ պարունակող մեկնաբանությունները կամ անընդունելի համարվող այլ բովանդակություն:

Leave a Reply

Your email address will not be published. Required fields are marked *