Վերջերս ձեւավորված «Panarmenian Media Holding»-ի (որի կազմում են Armenia TV, Armnews, ATV ալիքները, АrmRadio-ն, «TV Մոլ» շաբաթաթերթը, «Yes», «Նա/նե» ամսագրերը) գլխավոր պրոդյուսեր Հրաչ Քեշիշյանը ռուսերենով թողարկվող «Ի՞նչ, որտե՞ղ, ե՞րբ» հաղորդման լեզվի ընտրությունը պայմանավորում է Armenia TV-ի ցանկությամբ: «Հեռաձակելով այդ հաղորդումը ռուսերեն լեզվով՝ մենք որեւէ օրենք չենք խախտում, քանի որ հայերենով կամ հայերեն թարգմանությամբ հաղորդում հեռարձակելը միայն հանրային ալիքներին է վերաբերում: Armenia TV-ին ընտրել է ռուսերեն լեզուն, քանի որ հաղորդմանը հաճախ ռուսաստանցի գիտակներ են մասնակցում, որոնք, բնականաբար, հայերենի չեն տիրապետում»,- ասում է նա:Հրաչ Քեշիշյանը նշում է, որը ռուսերենով այդ նույն խաղը ցուցադրվում է Իսրայելում, Ուրկաինայում, Բելառուսում եւ հասցեագրված է ռուսերենին տիրապետողներին, իսկ մեր դեպքում՝ ռուսախոս հայաստանցուն: «Ի՞նչ, որտե՞ղ, ե՞րբ»-ի պրոդյուսեր Կարեն Քոչարյանի այն պնդումը, որ հաղորդումը հասցեագրված է ազգային փոքրամասնություններին, Քեշիշյանը փորձեց այսպես բացատրել. «Մենք այդպիսի գերնպատակ չունենք, բայց եթե այն օգուտ է տալիս ազգային փոքրամասնությանը, շատ լավ է»: Իսկ արդյոք խաղի հայերեն տարբերակն ավելի նախընտրելի չէ՞ր լինի հարցին նա պատասխանեց. «Նման մոնիտորինգ չենք անցկացրել, բայց կարծում եմ՝ այդ հայտնի խաղն ավելի լավ է ընկալվում ռուսերենով, որը փոխանցում է խաղի էությունը»: