Կառավարությունն այսօր հաստատել է Հայաստանում ինտերնետից օգտվողների թվի հաշվարկի մեթոդիկան:

Համաձայն կառավարության որոշման` ինտերնետ օգտատերերի հաշվարկի համար պատասխանատու գերատեսչությունները՝  ՀՀ ազգային վիճակագրական ծառայությունն ու Հանրային ծառայությունները կարգավորող հանձնաժողովը մինչեւ փետրվարի 20-ը պետք է ներկայացնեն անհրաժեշտ տվյալները:

Այս որոշմամբ կառավարությունն ընդունում է, որ Հայաստանում ինտերնետ օգտատերերի հաշվարկի մեթոդոլոգիան առայժմ ճշգրիտ չէ: Կառավարության որոշման հիմնավորման փաստաթղթում նշվում է.

«Նախկինում ցուցանիշը հավաքագրվել է Հեռահաղորդակցության Միջազգային Միության (ՀՄՄ) կողմից առաջարկված մեթոդիկայով: ՀՄՄ-ի մեթոդիկայով Հայաստանի Հանրապետությունում ինտերնետից օգտվողների թիվը ճշգրիտ չէ»։

Հայաստանում ինտերնետից օգտվողների ճշգրիտ թիվ հրապարակելն իրոք խնդիր է:  Հեռահաղորդակցության Միջազգային Միությունը (ITU) 2011 եւ 2012 թվականներին օգտագործում էր Հանրային ծառայությունները կարգավորող հանձնաժողովի տրամադրած տվյալները:

Համաձայն դրանց, 2010թ.-ին Հայաստանից ինտերնետ օգտատերերը կազմել են բնակչության 47.1%-ը, 2012-ին՝ 60.6%-ը: 2000-2009թթ.  ITU-ն ներկայացնում էր սեփական հետազոտության տվյալները, համաձայն որոնց, օրինակ 2009թ-ին Հայաստանում ինտերնետից օգտվում էր բնակչության 6.4%-ը:

Որպես Հայաստանում ինտերնետ օգտատերերի թվի մասին այլընտրանքային տեղեկատվություն օգտագործվում են նաեւ Հետազոտական ռեսուրսների հետազոտական կենտրոնի (CRRC) տվյալները: Համաձայն դրանց, 2011թ-ի վերջին Հայաստանում ինտերնետից օգտվում էր բնակչության 44.7%-ը:

Կառավարությունում ակնկալում են, որ հաստատված մեթոդոլագիան կօգնի պարզել Հայաստանում ինտերնետից օգտվողների իրական թիվը:

Գեղամ Վարդանյան