Ադրբեջանի մեծությամբ երկրորդ Գանձակ քաղաքի հոկտեմբերի 4-ի հրետակոծությունից հետո կեղծ լուր տարածվեց։ 

Հրետակոծության հետևանքով մի քաղաքացի մահացել էր, մի քանիսը՝ վիրավորվել։ Վիրավորվածներից մեկը սխալմամաբ ներկայացվեց որպես էթնիկ հայ։ Այս ապատեղեկատվությունը տարածվեց ոչ միայն սոցիալական մեդիայում։ Այն ադրբեջանական լրատվամիջոցներում (Azeridaily.com, azvision.az), այդ թվում պետության կողմից վերահսկվող Az TV ազգային հեռուստաընկերության նյութի վերնագիր դարձավ։ 

Վիրավորի անունը աղբյուրից աղբյուր տարբեր էր։ Մի դեպքում ներկայացված էր Կարինե Գրիգորյան, մեկ այլ դեպքում՝ Նինա Գրիգորյան։

Բացի ադրբեջանական աղբյուրներից, ոչ մի միջազգային լրատվամիջոց չգրեց վիրավորի հայ լինելու մասին*։ Փոխարենը Հովհաննես Նիկողոսյանի թվիթով այլ բան պարզվեց։ «Պարզվում է, իրականում նա ռուս Նինա Գրիգորենկոն է Ուկրաինայից», – գրել է նա։

There are so many falsehoods flooding from #Azerbaijan that sometimes you find it unreasonable even to react. E.g. fake ‘Armenian’ living in #Ganja/#Gence. Appears she is in fact #Russian Nina Grigorenko from Ukraine. No #Armenians in Azerbaijan since 1990.

Every life matters! pic.twitter.com/0eS4Yk5QTX

— Hovhannes Nikoghosyan (@hnikogh) October 4, 2020

Ասածն ապացուցելու համար նա տեղադրել է սքրինշոթ։ Դրանում երևում է «Եկատիրինա Վորոնենկո»-ի հրապարակումը ֆեյսբուքյան “Старый Баку” խմբում։ Նա գրել էր, որ վիրավորը իր նախկին սկեսուրն է, որի ամբողջական անունը Նինա Ռոմանովնա Գրիգորենկո է, ոչ թե Գրիգորյան, ինչպես ներկայացված էր հիվանդանոցում: Հեղնինակը պնդել է, որ վիրավորը ազգությամբ ռուս է, որ թե հայ և կոչ է արել մյուսներին օգնել այս սխալն ուղղել։ 

Որպես ասածի ապացույց նա հրապարակել է 3 նկար։ Դրանցից երկուսը սքրինշոթեր են, որ ներկայացնում են կեղծ պնդումով հրապարակումներ, մյուսում վիրավոր կինն է Ուկրաինայում։

Այս պահին մեջբերված հրապարակումը հասանելի չէ, բայց դրա իսկությունը հավաստող տվյալներ media.am-ին հաջողվել է գտնել։

• Ֆեյսբուքում իսկապես կա «Եկատիրինա Վորոնենկո» անունով օգտատեր։ Չնայած քիչ տեղեկություն է հանրային հրապարակված, սական, մեր ուսումնասիրությունից պարզ դարձավ, որ նա մեջբերված “Старый Баку” խմբի անդամ է և պարբերաբար այնտեղ հրապարակումներ է կատարում։
• Բոլոր հրապարակումները, ինչպես նաև սքրինշոթում երևացող, գրված են ռուսերեն։

Նրա ընկերների ցանկում մենք գտանք «Նադեժդա Գրիգորենկո» անունով օգտատիրոջը, որը ունի նույն ազգանունը, ինչ կնոջ ենթադրյալ նախկին սկեսուրը։

Արշալույս Բարսեղյան

*Հրապարակումը խմբագրվել հոկտեմբերի 6-ին, ժամը 10։00-ին: Այս հրապարակումից հետո մենք պարզեցինք, որ ռուսական “Дождь” առցանց հեռուստաընկերության Ադրբեջանում այս պահին աշխատող լրագրողը զրուցել է վիրավոր կնոջ հետ ու պարզել, որ նա կիսով չափ լեհ է, կիսով չափ՝ հրեա, կիսով չափ՝ հայ։ 

Նրա անունը Նինա Գրիգորենկո է, ինչպես ֆեյսբուքյան հրապարակման մեջ էր գրված։ Այսպիսով, ստացվում է, որ կինը հայկական արմատներ ունի, սակայն անդրբեջանական լրատվամիջոցները ճիշտ չէին ներկայացրել նրա ազգանունը։