Մեդիա նախաձեռնությունների կենտրոնը  հայտարարում է «Լսիր ինձ հիմա․ Հայաստանում փոդքասթինգի մշակույթի զարգացում» ծրագրի  երկրորդ փուլի մրցույթ։ Ընտրված մասնակիցները կստանան փոդքասթ (աուդիո բլոգ) ստեղծելու համար անհրաժեշտ գործիքներ  և գիտելիքներ․ ձայնագրման սարքավորումներ, համակարգիչ և խմբագրման ծրագիր․ 7-10 օրյա ճամբարի ընթացքում կմասնակցեն դասընթացների, կուսումնասիրեն  ձայնային ձևաչափերի առանձնահատկությունները, փոդքասթինգի պատմությունն ու զարգացման միտումները, կսովորեն սթորիթելինգի և սցենար ստեղծելու հիմունքները, կստանան հարցազրույց վարելու  հմտություններ, կստանան օգտակար օնլայն ռեսուսրների ցանկ, կծանոթանան փոդքասթների հարթակների առանձնահատկություններին և սեփական ալիքների առաջխաղացման հնարավորթյուններին։ Տեղացի և արտասահմանցի մասնագետները կշարունակեն օգնել փոդքասթերներին նաև արտադրության փուլում։

Ճամբարի ավարտից հետո ծրագրի մասնակիցները  հնարավորություն կունենան ներկայացնել իրենց գաղափարները  դրամաշնորհային մրցույթի և ընտրվելու դեպքում կստանան դրամական աջակցություն՝ սեփական նախագծերն իրականացնելու համար: Մրցույթի պայմանները կներկայացվեն լրացուցիչ։

Ծրագրին կարող են մասնակցել.

• լրագրողներ
• բլոգերներ
• ուսանողներ
• քաղաքացիական նախաձեռնությունների և հասարակական կազմակերպությունների ներկայացուցիչներ

Մասնակցության համար անհրաժեշտ է լրացնել հայտադիմումը՝ մանրամասն պատասխանելով բոլոր հարցերին:

Ծրագրի մասնակիցներին ընտրելու է մասնագիտական հանձնաժողովը։ Առաջին փուլում այն գնահատելու է ներկայացված հայտերը, ապա հարցազրույցներ է անցկացնելու երկրորդ փուլ անցած դիմորդների հետ։ Հայտերի գնահատման չափանիշներն են․

• առաջարկվող գաղափարի յուրահատկությունը,
• թեմաների հանրային կարևորությունն ու թիրախային լսարանը,
• դիմորդի հետաքրքրվածությունը փոդքասթ մեդիայով և  Հայաստանում փոդթասքի մշակույթի տարածմամբ,
• նմանատիպ փորձի առկայությունը (պարտադիր չէ, սակայն հաշվի կառնվի)
• անգլերենի իմացությունը կդիտվի որպես առավելություն (դասընթացին մասնակցելու տեսակետից)։

Հայտերի ներկայացման վերջնաժամկետը 2019թ․ հոկտեմբերի 6-ն է։
Ուսումնական ճամբարը կանցկացվի Երևանից դուրս հոկտեմբեր կամ նոյեմբեր ամիսներին։

Հարցերի դեպքում դիմել ծրագրի համակարգող Քնար Խուդոյանին՝ [email protected] էլ. հասցեով կամ 010 583620 (ներքին` 122) համարով:

Ծանոթագրություն․ Փոդքասթները աուդիոբլոգեր են, որոնք առանձնանում են իրենց տարածման և սպառման մեթոդներով: Փոդքասթ ալիքներին  կարելի է բաժանորդագրվել, ապա՝ ներբեռնել և լսել էպիզոդները՝ երբ ու որտեղ հարմար է։ Փոդքասթ ալիքը կամ բլոգը կարող է լինել ցանկացած թեմայով և ժանրով՝ սկսած լուրերից, մինչև հետաքննություն, հումորային սկետչ կամ ռադիոդրամա։ Մեդիա տեսաբանների խոսքով, փոդքասթները  ռադիոյի լավագույն ավանդույթների վերածնունդն են, դրանց առաձնահատկությունների մասին ավելի մանրամասն կարդացեք այստեղ կամ այստեղ։

Ծրագիրն իրականացնում է Մեդիա նախաձեռնությունների կենտրոնը՝ Հայաստանում ԱՄՆ դեսպանատան աջակցությամբ: