Արփի Ջանյան. «Ես եմ մեդիան»

25.09.2017, vox populi

#Բարև,

Ես մեդիայի կողմից ստեղծված մարդ եմ: Ամերիկացները կասեին՝ «Media Created»:

Ես սիրում եմ իմ ֆեյսբուքի թայմլայնը, համարյա այնքան, ինչքան որոշ լրատվական կայքերի՝ մեծ հետույք ունենալու առավելությունների մասին հոդվածներն եմ սիրում:

Չեմ սիրում թուրքերին, սիրում եմ քաղաքականություն: Ներկա Հայաստանից ավելի կարևոր համարում եմ Արևմտյան Հայաստանը: Ռեալ-Բարսելոնա խաղի ժամանակ «բալետ եմ անում» Հենրիխ Մխիթարյանին:

Ես հաճախ վիտուալ աղոթում եմ հանուն հայ զինվորի լավակեցության՝ չմոռնալով փաստել, որ անխտիր բոլոր ադրբեջանցիները քոչվոր ոչխար են:

Այդպես սնում եմ իմ ներքին հայու տեսակին և պահպանում հայու բազմաչարչար գենը: Հաճախ լսում եմ, որ այդ ամենը ֆիկցիա է, բայց դա իմ տա… բանջարաբոստանային համակարգին էլ չի, որովհետև ես իմաստուն եմ: Ես կարդացել եմ իմաստուն մարդու մասին բոլոր յոթ ցիտատները:

Իմ նկարներում չի երևում հեռավոր երկնակամարին ձգտող քիթս ու ավելորդ կիլոգրամներս: Այպիսով` մեդիան ինձ է խաբում, թելադրելով գեղեցկության հորինված ստանդարտները, ես էլ մեդիային` «համապատասխանելով» դրանց: Ես մեդիայի կրողն ու փոխանցողն եմ: Սպառողն ու ստեղծողը:

Մոտակա օրերին պատրաստվում եմ այցելել գրագետ լինելու մասին մի քանի ՀԿ-ների կողմից կազմակերպված դասընթացին: Անտեղ շա՜տ գրագետ հաց են տալիս:

Համեստությունից հետո, իմ երկրորդ կարևոր հատկանիշը առևտրային քթածակն է: Ես բիզնեսի գուրու եմ: Կարդացել եմ բիզնեսի 100 գաղտնիքների մասին:

Ես պատրաստ եմ ավելի լավը դարձնել երկիրս` վերոհիշյալ հետույքս աթոռից չպոկելով:

Հիմա դուք ճանաչում եք ինձ` իմ մերկությամբ: Ես կարող էի ավելի լավը լինել, բայց դա ձեզնից շատ աշխատանք է պահանջում: Այն, թե ինչպիսին եմ ես, կախված է, թե ինչով եք սնում ինձ: Ինչ պահանջարկ եք ստեղծում և ինչ առաջարկ ապահովում:

Անկախ նրանից, դուք` սպառողներդ, եք ստեղծում մեդիան, էլիտար փոքրամասնությունը, որը նաև կառավարում է այն, թե մեդիան ստեղծվում է սպառողի և արտադրողի փոխազդեցության արդյունքում, յուրաքանչյուրը պետք է պատասխանատվություն կրի, քանի որ դուք դաստիարակում եք ինձ՝ այդ մեդիայիով սնվող մարդուն:

Այն, թե ինչպիսի ազդեցություն կունենա մեդիան հասարակության կյանքում, կախված է նրանից, թե ինչպես է հասարակությունը ընտրում օգտագործել այդ մեդիան: Օրինակ` դարձնե՞լ այն գաղափարախոսությունների բախման հարթակ, թե՞ բամբասանքներ տարածող «փչացած հեռախոս»:

Առաջին դեպքում դուք (կարդացեք՝ մենք) կրթվում ենք, զարգանում, սովորում, երկրորդ դեպքում` ավելի խորը խրվում մեր հարմարավետության գոտու ճահճի մեջ:

Քանի որ ես՝ մեդիայի կողմից ստեղծված մարդս, ամեն օր շփվում եմ յուրաքանչյուրիդ հետ ու դրանով առնվազն որևէ կերպ ազդում ձեր վրա, հիշեք իմ մասին ամեն քլիքից առաջ:

Մեդիան ես եմ` ձեր մատների ծայրերին:

 

Արփի Ջանյան
Հայաստանի ամերիկյան համալսարան, Գործարար կառավարման ֆակուլտետ,
Այս աշխատանքը զբաղեցրել է 2017թ. «Ես եմ մեդիան» մրցույթի երկրորդ տեղը

 

Սյունակում արտահայտված մտքերը պատկանում են հեղինակին եւ կարող են չհամընկնել media.am-ի տեսակետների հետ:

Մեկնաբանել

Media.am-ի ընթերցողների մեկնաբանությունները հրապարակվում են մոդերացիայից հետո: Կոչ ենք անում մեր ընթերցողներին անանուն մեկնաբանություններ չթողնել: Միշտ հաճելի է իմանալ, թե ում հետ ես խոսում:
 

Media.am-ը չի հրապարակի զրպարտություն, վիրավորանք, սպառնալիք, ատելություն, կանխակալ վերաբերմունք, անպարկեշտ բառեր եւ արտահայտություններ պարունակող մեկնաբանությունները կամ անընդունելի համարվող այլ բովանդակություն:
Լրացուցիչ տեղեկություններ ?