Մարտի 23-ին հայկական մի շարք լրատվական կայքեր և սոցցանցերի էջեր տարածեցին «Իսլանդիայի կրթության նախարարը հրաժարական է տվել 15-ամյա տղայի հետ uիրավեպի պատմության պատճառով» խորագրով նյութեր և գրառումներ:
Տեղեկությունը տարածվում էր Իսլանդիայի 58-ամյա նախարար Ասթիլդուր Լոա Թորսդոտտիրի լուսանկարով՝ առանց նշման, որ դեպքը տեղի է ունեցել մոտ 36 տարի առաջ, երբ նախարարը 22 տարեկան էր։
Նման վերնագրեր էին ընտրել՝ այդ թվում Tert.am-ը, Lurer.com-ը, Ամբիոն.news-ը։
News.am-ը ևս վերնագրում չէր շեշտել, որ խոսքը ավելի քանի 30 տարի առաջ տեղի ունեցած դեպքի մասին է։ Կայքը նյութը վերնագրել էր՝ «Իսլանդիայի երեխաների գործերով նախարարը հրաժարական է տվել, քանի որ խոստովանել է, որ երեխա է ունեցել դեռահասից»։
Zona Positive ֆեյսբուքյան էջը նաև նշել էր (արխ.), որ նախարարը սեռական հարաբերություն է ունեցել 15-ամյա դեռահասի հետ և նրանից երեխա ունեցել՝ կրկին առանց հաղորդելու դեպքի մանրամասները։ Նույն կերպ տեղեկությունը տարածվել էր նաև տելեգրամում։
Նման վերնագրերը կարող են թյուրիմացություն առաջացնել ընթերցողի մոտ՝ տպավորություն ստեղծելով, թե դեպքը նոր է և տեղի է ունեցել նախարարի պաշտոնավարման ընթացքում։ Դրանում համոզվում ենք՝ ընթերցելով հրապարակումների մեկնաբանությունները։ Ճիշտ է, կայքերը նյութի բովանդակության մեջ մանրամասնել էին, որ դեպքը տեղի է ունեցել ավելի քան 30 տարի առաջ, սակայն վերնագրերից նման ենթադրություն չէր հետևում։
Հայկական լրատվականները տեղեկությունը մեծամասամբ արտատպել էին BBC-ից, որը, ի տարբերություն մյուսների, վերնագրում նշել էր, որ խոսքը մոտ 30 տարվա հնության պատմության մասին է։
Առաջինն այս տեղեկությունը տարածել էր Իսլանդիայի հանրային հեռարձակող RÚV-ը (Ríkisútvarpið) մարտի 20-ին։ Լրատվամիջոցը գրել էր, որ ավելի քան երեք տասնամյակ առաջ երեխաների հարցերով նախարար Ասթիլդուր Լոա Թորսդոտտիրը սիրավեպ է ունեցել 15-ամյա տղայի հետ, որից հղիացել է հաջորդ տարի, երբ նա 23 տարեկան էր, իսկ տղան՝ 16։
Լրատվամիջոցի փոխանցմամբ՝ նա հանդիպել էր երիտասարդին, երբ Կոպավոգուրի կրոնական խմբում ղեկավարում էր երիտասարդական աշխատանքները։ RÚV-ը կապ էր հաստատել տվյալ տղամարդու հետ, որն էլ հաստատել էր տեղեկությունը։
Լրատվամիջոցի հրապարակումից կարճ ժամանակ անց նախարարը հրաժարական էր ներկայացրել՝ փաստացի ընդունելով կատարվածը և պատճառաբանելով, որ այդ հարաբերությունները իր երիտասարդության սխալն են եղել, և ինքը չի ցանկանում ստվերել նախարարության ու կառավարության աշխատանքը։
Այսպիսով, հայկական լրատվականները մոլորեցնող վերնագրեր էին ընտրել Իսլանդիայի երեխաների հարցով նախարարի հրաժարականի պատմությունը ներկայացնելու համար։
