Ազգային ժողովի «Քաղաքացիական պայմանագիր» կուսակցության պատգամավոր Վիլեն Գաբրիելյանը վայր է դրել մանդատը։
Պատճառը մարտի 30-ին Գյումրիի ընտրությունների ժամանակ «Եվրոմեդիա 24» լրատվամիջոցի լրագրող Կորյուն Սիմոնյանի հետ տեղի ունեցած միջադեպն է եղել։
Ոչ սթափ վիճակում գտնվող պատգամավորը Կորյուն Սիմոնյանի հետ զրուցելիս օգտագործել է սեռական բնույթի հայհոյանք ու սպառնացել է միկրոֆոնով հարվածել լրագրողի գլխին։
Իր ֆեյսբուքյան էջում Գաբրիելյանը գրել է, որ իր համոզմամբ քաղաքական գործընթացներում առանցքային դեր ունի քաղաքական պատասխանատվություն կրելու մշակույթը, իսկ դրա համար համապատասխան կամք ու վճռականություն է պետք, ինչին նա տիրապետում է։
«Անցած կիրակի Գյումրի քաղաքում իմ մասնակցությամբ այսպես ասած միջադեպերը համարում եմ ոչ վայել Հայաստանի Հանրապետության Ազգային Ժողովի պատգամավորի վարքին: ԱԺ պատգամավորն իր առաքելությունում պարտավոր է չդրսևորել անհարկի վարքագիծ»,- գրել է պատգամավորը:
Նա նաև նշել է, որ ինքնաառաջդրվելու է «Քաղաքացիական պայմանագիր» կուսակցության առաջիկա վարչության ընտրություններում՝ որպես վարչության անդամի թեկնածու։ Նրա գնահատմամբ կուսակցությունն ունի լրջագույն առողջացման և կերպարանափոխման կարիք:
Ինչ էր եղել Գյումրիում․ դեպքի մանրամասները
Գյումրիի արտահերթ ընտրությունների ժամանակ «Քաղաքացիական պայմանագիր» կուսակցության պատգամավոր Վիլեն Գաբրիելյանը՝ «Եվրոմեդիա 24»-ի լրագրող Կորյուն Սիմոնյանի հետ զրուցելիս օգտագործել է սեռական բնույթի հայհոյանք ու սպառնացել է լրագրողին։ ԱԺ պատգամավորը մինչև այդ միջադեպը ու այդ միջադեպից հետո մի քանի անգամ ուղիղ եթերում ասել է, որ ինքն ալկոհոլ է օգտագործել։
Կորյունը պատմում է որ, միջադեպը սկսել է պատգամավորի հարցից։ Պատգամավորը փորձել է պարզել, թե ինչո՞ւ է լրագրողն իրեն թարս նայում։
«Ընտրատեղամասից դուրս գալիս տեսա, որ Վիլեն Գաբրիելյանը և իրենց կուսակցության ևս մեկ անդամ ոստիկաններով շրջապատված կանգնած են փողոցում։ Ակնհայտ էր, որ պատգամավորը սթափ վիճակում չէր։ Նա, նկատելով ինձ, հարցրեց թե ինչո՞ւ եմ իրեն թարս նայում։ Ես էլ որոշեցի միացնել տեսախցիկն ու նոր մոտենալ նրան։ Փոխադարձաբար հարցրեցի, արդյոք խմա՞ծ է և եթե այո, ապա ո՞րն է պատճառը կամ առիթը»,- ասում է Կորյուն Սիմոնյանը։
Հետո, երբ լրագրողը փորձել է հեռանալ պատգամավորը սկսել է հետապնդել նրան, անհարգալից խոսքեր ասել ու հայհոյել։ Կորյունը պատմում է, որ Գաբրիելյանին ուղեկցողն էլ անհարգալից խոսքեր է հնչեցրել, «Եվրոմեդիա 24» -ի երկու կին լրագրողների հասցեին։
Միջադեպից հետո, Գյումրիում աշխատող մյուս լրագրողները մինչև ուշ գիշեր պահանջում էին պատգամավորից ներողություն խնդրել ու հայտարարել մանդատը վայր դնելու մասին։
Գաբրիելյանը ներողություն չխնդրեց, մանդատը վայր դնելու պահանջն էլ կիրակի երեկոյան այսպես մեկնաբանեց. «2026-ին իշխանությունը փոխվելու է, էլ խի՞ եմ ես մանդատս վայր դնում»:
Նույն օրը՝ Գյումրիում, Վարչապետի խոսնակ Նազելի Բաղդասարյանը, պատասխանելով լրագրողների հարցին, թե ինչպես է գնահատում իրենց կուսակցության ներկայացուցչի վարքագիծը՝ տեսագրությունը դիտելուց հետո ասել էր․
«Ցանկացած պարագայում լրագրողի գործունեությունը խոչընդոտելն անընդունելի է ։ Ընդհանրապես որևէ մեկին հայհոյել չի կարելի»։
Ընտրությունների հաջորդ օրն էլ Ազատության եթերում ՔՊ-ական պատգամավոր Արսեն Թորոսյանն էր անդրադարձել տեղի ունեցածին։ Նա ասել էր, որ կուսակցությունում քննարկում կլինի, սակայն այլ մանրամասներ չէր ներկայացրել։
«Կարծում եմ, որ պետք է հանրային իշխանության ցանկացած ներկայացուցիչ իր հանրային վարքագծում պահպանի կոռեկտության բոլոր կանոնները, հատկապես նման կարգավիճակ ունեցող անձը», – ասել էր Թորոսյանը:
Փորձագիտական կարծիք
Խոսքի ազատության պաշտպանության կոմիտեի (ԽԱՊԿ) նախագահ Աշոտ Մելիքյանի կարծիքով կատարվածը դուրս է պատգամավորական էթիկայի նորմերի շրջանակից և հարիր չէ բարձրաստիճան պաշտոնյային։
«Այս դեպքում պաշտոնատար անձի էթիկական կանոնների մասին խոսելն անգամ ավելորոդ է, կատարվածը կարելի է որակել որպես խուլիգանական պահվածք»,- ասում է Աշոտ Մելիքյանը։
Վերջին շրջանում հատկապես իշխող ուժի կողմից լրագրողներին վիրավորելու, թիրախավորելու դեպքերը Մելիքյանը պայմանավորում է նաև օրենսդրական բացթողումներով։ Նրա կարծիքով ԱԺ-ում պետք է ստեղծվի պատգամավորական էթիկայի հանձնաժողով, որը մշտապես կգործի և կքննի պատգամավորների վարքագիծն ու իր գնահատականը կտա։
«Մեզանում արատավոր ավանդույթ է ձևավորվել, որ ցանկացած լարված իրավիճակում և՛ քաղաքական ուժերը և՛ անհատ գործիչները փորձում են սեփական սխալները բարդել լրագրողների վրա։ Լրագրողական քննադատությունը որակել որպես պատվեր, վիրավորանք կամ զրպարտություն։ Սա քաղաքական կուլտուրայի բացակայության կամ շատ ցածր մակարդակի մասին է խոսում»,- ասում է Մելիքյանը։
ԽԱՊԿ նախագահի կարծիքով լրագրողների և քաղաքական գործիչների միջև առկա լարվածության պատճառներից մեկն էլ այն է, որ լրատվական դաշտը բևեռացված է։ Լրատվամիջոցները իրենց քաղաքական հակվածությամբ պայմանավորված կոնկրետ խնդիրներ են կատարում։ Եվ այս իրավիճակում գլխավոր խնդիրը հակառակ ճամբարի գործիչներին կամ հակառակ ճամբարին հարող լրատվամիջոցներին նսեմացնելն է դառնում։
Փորձագետը, անդրադառնալով Գյումրիում տեղի ունեցած միջադեպին, նշում է, որ լրագրողական էթիկայի տեսանկյունից ևս բացթողումներ կային։
«Լրագրողներն իրավիճակը առավելագույնս օգտագործեցին ընդդեմ պատգամավորի և կարծում եմ, որ մեծ հաշվով իրենց ուզած նպատակին հասան։ Հանրությանը ցույց տվեցին, իշխող պատգամավորի անընդունելի վարքագիծը։ Սակայն կարծում եմ, որ կարելի էր պատգամավորի ոչ սթափ լինելն ու ոչ պատշաճ վարքագիծը՝ հայհոյախառն արտահայտությունները լրագրողի նկատմամբ արձանագրելուց, տեսաձայնագրելուց հետո եզրափակել թեման։ Կոնֆլիկտը, վարքագիծը հանրայնացված էր և դրա դատապարտումը պետք է այլ ժամանակ ու այլ պայմաններում պահանջվեր»,- ասում է Մելիքյանը։
Նրա կարծիքով մյուս լրագրողների կողմից ոչ սթափ մարդուց պատասխան պահանջելը դուրս էր լրագրողական էթիկայի սահմաններից։
