Հեռուստառադիոընկերությունների լիցենզիան կասեցնելու իրավունքը, որը խորհրդարանում շրջանառության դրված օրինագծով վերապահվում է Հեռուստատեսության և ռադիոյի ազգային հանձնաժողովին, նախագծի հեղինակը համարում է օրենքների շրջանակում, իսկ ձևակերպումների հարցում պատրաստ է ընդունել դիտողություններ և առաջարկություններ:

Կառավարությունը մարտի 10 -ին խորհրդարան է ներկայացրել Հեռուստատեսության և ռադիոյի մասին օրենքում լրացումների նախագիծ, որով Հեռուստատեսության և ռադիոյի ազգային հանձնաժողովը նախընտրական քարոզարշավի ժամանակ կրկնակի խախտում թույլ տված հեռուստառադիոընկերությունների հեռարձակման լիցենզիան կասեցնում է մինչև տվյալ ընտրության քվեարկության ավարտը:

Նախագծում ձևակերպված այդ խախտումներից երկուսը բավական դժվար գնահատելի են և կամայականորեն մեկնաբանելի. օրինակ, խտրականության դրսևորումը և քարոզչության վերաբերյալ անկողմնակալ, գնահատականներից զերծ տեղեկատվություն չապահովելը:

Նախագիծը մշակել է արդարադատության նախարարությունը: Նախարար Արփինե Հովհաննիսյանից Media.am-ը գրավոր հարցով հետաքրքրվեց, թե արդյո՞ք սա չի նշանակում ինչ-որ իմաստով դատարանի իրավունք վերապահել Հանձնաժողովին:  

Նախարարության լրատվական վարչությունից ստացված գրավոր պատասխանում ասվում է.

«Կասեցման  կարգի առանձնահատկությունները նախատեսվում են Լիցենզավորման մասին օրենքով, որի համապատասխան, լիցենզիայի կասեցում իրականացվում է լիցենզավորող մարմնի կողմից. այս դեպքում՝ Հեռուստատեսության և ռադիոյի ազգային հանձնաժողովի կողմից: Այսինքն, մեր օրենսդրությամբ արդեն իսկ ճանաչվում է լիցենզավորող մարմնի կողմից լիցենզիայի կասեցման հնարավորությունը»:

Ինչ վերաբերում է ձևակերպումներին, օրինագծի հեղինակ գերատեսչության ղեկավարը փոխանցում է, որ քանի դեռ նախագիծը քննարկումների փուլում է՝ «պատրաստ ենք ընդունել դիտողություններ և առաջարկություններ, սակայն ուզում եմ ընդգծել, որ լիցենզիան կասեցվում է ոչ թե միանգամից, այլ այն դեպքում, երբ արդեն  մեկ անգամ տուգանք նշանակվել է և կրկին խախտում է թույլ տրվել: Բացի դրանից, մի կարևոր փաստ ևս կա. հեռուստառադիոընկերություններն իրավունք ունեն դիմելու դատարան` Ազգային հանձնաժողովի որոշումներն անվավեր ճանաչելու կամ փոփոխելու պահանջով»:

Մի դիտարկում. 2000թ. Հեռուստատեսության և ռադիոյի մասին օրենքի ընդունմանը նախորդած երկարատև ու բուռն քննարկումներում հատկապես շեշտվում էր, որ Հեռուստատեսության և ռադիոյի ազգային հանձնաժողովը չպետք է ունենա հեռուստառադիոընկերությունների հեռարձակման լիցենզիան կասեցնելու կամ դրանից զրկելու իրավունք՝ եթե չկա դատարանի համապատասխան որոշում: Դա էին պնդում նաև եվրոպական փորձագետները:

Իսկ որ լիցենզիայի կասեցման որոշումը կարելի է բողոքարկել դատարանում, այս նախագծի առիթով Media.am-ին ավելի վաղ տված հարցազրույցում Խոսքի  ազատության պաշտպանության կոմիտեի նախագահ Աշոտ Մելիքյանն ասել է.  «Ընտրությունների ժամանակ հեռարձակողները դժվար թե հասցնեն դատարանում վիճարկել կասեցման որոշումը և , փաստորեն, «կլռեն» մինչև քվեարկության ավարտը»:

Մելիքյանը նախագծի այս լրացումները բնորոշել է որպես դատարանի լիազորությունների վերապահում ՀՌԱՀ-ին և Դամոկլյան սուր՝ կախված մալուխային հեռարձակողների գլխին ( մալուխային հեռարձակողների դեպքում նախագիծն ամրագրում է, որ նախընտրական քարոզչության ժամանակ նրանք կարող են հեռարձակել վերգետնյա հեռուստաընկերությունների միայն վերգետնյա եթերային ծրագրերը):

Ռուզան Խաչատրյան