Հունվարի 16-ի գիշերը այրել են «Լոռի» հեռուստաընկերության գլխավոր խմբագիր Նարինե Ավետիսյանին պատկանող ավտոմեքենան: Նա առավոտյան աշխատանքի գնալիս բացել է շենքի բակում գտնվող ավտոտնակի դարպասները եւ մեքենան գտել հրկիզված վիճակում: Ավտոմեքենայի վրա հայտնաբերվել են այրված լաթի կտոր եւ հեղուկ վառելանյութի հետքեր:
Խմբագիրը չի կարծում, որ սա անձնական հողի վրա կատարված արարք է, ոչ էլ կարողանում է լրագրողական գործի հետ կապել:
Վերջին 5 տարիների ընթացքում սա արդեն 3-րդ նմանատիպ դեպքն է, երբ որեւէ կերպ վնաս են հասցնում Նարինե Ավետիսյանին:
Ներքին գործերի Լոռու մարզային վարչության Վանաձորի բաժնում հարուցվել է քրեական գործ: Պարզվել է, որ այրված լաթի կտորը գցվել է ավտոտնակի վերեւի օդանցքից, որտեղից էլ լցվել է նաեւ հեղուկ վառելանյութը: Ավտոտնակի ձյունապատ տանիքին հայտնաբերվել են նաեւ ոտնահետքեր:
