Բանակում խաղաղ պայմաններում մահացած զինվորների մասին լուրերը մեդիայում շատ են ու հաճախ նաև չպարզաբանված:

«Լրագրողներ հանուն մարդու իրավունքների» հասարակական կազմակերպության նախագահ Ժաննա Ալեքսանյանը կարծում է, որ մեղքի իր բաժինն ունի ՊՆ-ն, որը ժամանակին և ճշտված տեղեկություն չի հաղորդում մամուլին:

«Որպեսզի մամուլը չշեղվի, ենթադրություններ չանի ու չսխալվի»,- ասում է Ժաննա Ալեքսանյանը:

Նա նկատել է, որ հաճախ ՊՆ հաղորդագրությունները հայտնվում են լրատվական հոդվածների հրապարակումից հետո, որպես պատասխան: 

Իսկ երբեմն մամուլում հրապարակված լուրը ՀՔԾ-ի կամ ՊՆ-ի համար առիթ է, որն օգնում է ընտանիքին հոգեբանորեն պատրաստել զինվորի մահվան գույժին. «Նման փորձ կա, բայց դա վատ փորձ է»:

Ժաննա Ալեքսանյանն ակնհայտ է համարում նաև այն, որ լրագրողները, քննադատելով ՊՆ-ի կամ այլ փակ կառույցների աշխատանքը, ավելի զգույշ ու մեղմ են՝ գերադասելով փորձանքից հեռու մնալ և հղում անել միայն ապահով կողմին: 

Մինչդեռ հենց լրագրողները կարող են ստիպել ՊՆ-ին աշխատել ավելի թափանցիկ, բաց և հաշվետու:

Գեղամ Վարդանյան