Հոկտեմբերի 1-ին «Հայաստան խմբակցության» պատգամավոր Ագնեսա Խամոյանը Ազգային ժողովի ամբիոնից հայտարարեց, որ Հայաստանում միայն 2024 թվականին 50 հազար քաղաքացու քաղցկեղ է ախտորոշվել։
«Նախ ուզում եմ արձանագրել, թե չարորակ նորագոյացություններով քանի հիվանդություն է ախտորոշվել քաղաքացիների մոտ։ Միայն 2024 թվականին 50 հազար քաղաքացու մոտ արձանագրվել է քաղցկեղ հիվանդությունը»,- ասաց նա։
Ի պատասխան՝ Առողջապահության նախարարի մամուլի խոսնակ Մարիամ Ծատրյանը ֆեյսբուքյան իր էջում Խամոյանի հայտարարությունը մոլորեցնող որակեց և ասաց, որ 50 հազարը քաղցկեղ ունեցողների ընդհանուր թիվն է Հայաստանում, իսկ 2024 թվականին հիվանդությունն ախտորոշվել է 7000 անձի․
«․․․ Ինչպես ի պատասխան նրա գրավոր հարցմանն ենք ներկայացրել, հիմա ևս վերահաստատում ենք. 2024 թվականի դրությամբ ՀՀ-ում ՀԱՇՎԱՌՎԱԾ Է քաղցկեղ ունեցող 50 հազ. քաղաքացի, որոնցից առաջնակի հիվանդներն են 7000-ը»,- գրել էր մամուլի խոսնակը:
Ագնեսա Խամոյանը «Ստուգված է»-ին փոխանցեց, որ «շփոթ է տեղի ունեցել, իրականում 50 հազարը քաղցկեղով հաշվառվածների թիվն է, իսկ 2024-ին առաջնակի հիվանդների թիվը 7000 է, սակայն դրանից խնդրի էությունը չի փոխվում»։
«Ստուգված է»-ն, սակայն, պարզել է, որ հրապարակված բոլոր թվերն էլ չեն արտացոլում Հայաստանում քաղցկեղով հաշվառվածների և 2024-ին արձանագրված նոր դեպքերի իրական ցուցանիշները։
Վիճակագրական կոմիտեի տվյալների համաձայն՝ 2024 թվականի դրությամբ Հայաստանում կա քաղցկեղ ունեցող 70 673 անձ։
Իսկ 2024-ին արձանագրված նոր դեպքերի քանակը 10,180 է։
Քաղցկեղ ունեցողների թիվը, ըստ Առողջապահության ազգային ինստիտուտի «Առողջություն և առողջապահություն» վիճակագրական տարեգրքի, 50 հազարին ամենամոտը եղել է 2019-ին և 2020-ին, համապատասխանաբար՝ 50,300 և 50,416 քաղցկեղ ունեցող։
Առողջապահության նախարարության մամուլի խոսնակը մեզ հետ զրույցում պարզաբանեց, որ իր հրապարակած 50 հազար թիվը վերաբերում է այն քաղաքացիներին, որոնք բուժում են ստանում պետպատվերի շրջանակում` օգտվելով տարբեր միջոցառումներից:
Այսպիսով, Ագնեսա Խամոյանի պնդումը, թե 2024-ին 50 հազար քաղաքացու դեպքում արձանագրվել է քաղցկեղ, սխալ է։ Իրականությանը չի համապատասխանում նաև պնդումը, թե Հայաստանում քաղցկեղ ունեցողների կամ քաղցկեղով հաշվառվածների թիվը 50 հազար է։ Իրականում, 2024 թվականի տվյալներով, Հայաստանում կա քաղցկեղ ունեցող 70,673 անձ։
