Կառավարությունը հավանել է սուրդոթարգմանությամբ հաղորդումներ հեռարձակելու օրենքի նախագիծը

13.07.2011, Նյուսրում

Կառավարությունը հավանություն է տվել «Հեռուստատեսության եւ ռադիոյի մասին» ՀՀ օրենքում լրացում եւ փոփոխություն կատարելու օրենքի նախագծին, որով ակնկալվում է բարելավել լսողության խանգարում ունեցող անձանց տեղեկատվություն ստանալու հնարավորությունը։

Նախագծով նախատեսվում է «Հեռուստատեսության եւ ռադիոյի մասին» Հայաստանի Հանրապետության օրենքը լրացնել նոր 5.1-րդ հոդվածով, որի համաձայն Հանրային հեռուստառադիոընկերությունը եւ մանկական եւ/կամ լրատվական հեռուստահաղորդումներ հեռարձակող մասնավոր հեռուստաընկերությունները պարտավորվում են հեռարձակել օրվա եթերաժամում առնվազն մեկական մանկական եւ/կամ լրատվական հեռուսահաղորդում uուրդոթարգմանու­թյամբ (ժեստերի լեզվով) կամ հայերեն լուuագրով:  

Լսողական հաշմանդամություն ունեցող անձանց տեղեկատվություն ստանալու իրավունքի խնդիրը հատկապես սրվեց այս տարվա հունվարին, երբ «Հեռուստատեսության եւ ռադիոյի մասին» օրենքում կատարված փոփոխությունների հետեւանքով 2011 թվականից մայրաքաղաքում հեռարձակվող հեռուստաալիքների թիվը 22-ից կրճատվեց 18-ի, եւ սուրդոթարգամանությամբ լրատվություն մատակարարող միակ հեռուստաընկերությունը՝ ԱԼՄ-ն, Հեռուստատեսության և ռադիոյի ազգային հանձնաժողովի (ՀՌԱՀ) հայտարարած կապուղիների վերջին մրցույթում թվային հեռարձակման լիցենզիա չստանալով, հունվարի 20-ից դադարեցրեց հեռարձակումը:

Խուլ երիտասարդների «Լռության ձայն» ֆեյսբուքյան համայնքը, որը ստեղվծել է «Լրագրողներ հանուն ապագայի» ՀԿ-ի նախաձեռնությամբ, անմիջապես սկսեց պայքարել խուլերի տեղեկացված լինելու իրավունքի համար:

Երիտասարդները բաց նամակով դիմեցին ՀՌԱՀ նախագահ Գրիգոր Ամալյանին՝ պահանջելով չանտեսել ՀՀ 3500 լսողության խանգարում ունեցող քաղաքացիների տեղեկացված լինելու իրավունքը եւ անհապաղ միջոցներ ձեռնարկել հունվարի 20-ից լրատվական հաղորդումների ժեստերի լեզվով թարգամնության համար` չխախտելով լսողության խնդիր ունեցող քաղաքացիների իրազեկված լինելու իրավունքը: Ինչին Ամալյանը պատասխանեց, թե լրատվական թողարկումները զուգորդված հայերեն լուսագրեր ունեն եւ դրանք չեն խոչընդոտում ՀՀ խուլուհամր քաղաքացիների լրատվություն ստանալու իրավունքի իրացմանը, քանի որ պետությունը ապահովում է խուլուհամր բնակչության դպրոցական կրթությունը:

«Նրանց համար ժեստերի լեզուն մայրենի լեզու է, եւ տասնիհիգ րոպե հաղորդում լսելն ավելի ընդունելի է, քան ամբողջ օրը87 լուսագրերով տեղեկատվություն ստանալը, հատկապես երբ պատկերն ու տեքստը չեն համապատասխանում իրար»,- ասում է «Լրագրողներ հանուն ապագայի» ՀԿ-ի նախագահ Սուրեն Դեհերյանը:

Նա բաց նամակով դիմել էր Մարդու իրավունքների պաշտպան Կարեն Անդրեասյանին, ով գլխավորում է Հայաստանում անալոգայինից թվային հեռարձակման անցնելու գործընթացը կարգավորող օրենսդրական բարեփոխումների հարցով աշխատանքային խումբը, եւ խնդրել էր «Հեռուստատեսության եւ ռադիայի մասին» օրենքի լրամշակված նախագծում փոփոխություններ կատարել լսողության խնդիրներ ունեցող անձանց տեղեկացված լինելու իրավունքն ապահովելու համար:

ՄԻՊ-ը խոստացել էր զբաղվել այդ հարցով եւ նամակն ուղարկել էր Կառավարություն: Այժմ Կառավարությունն այն սահմանված կարգով ներկայացնելու է Ազգային ժողով:

 

«Թեեւ Կառավարությունից պաշտոնական նամակ դեռ չենք ստացել, սակայն լրատվությունից արդեն տեղյակ ենք եւ ողջունում ենք, որ Կառավարությունն առանց հետաձգելու անդրադարձել է խնդրին եւ հավանության է արժանացրել առաջարկությունը: Մենք լիահույս ենք, որ Ազգային ժողովը հաշվի կառնի խնդրի կարեւորությունը, եւ այն օրենքի տեսք կստանա»,- ասում է ՄԻՊ գրասենյակում երեխաների պաշտպան Երանուհի Թումանյանցը:

Նրա խոսքերով՝ ՄԻՊ գրասենյակը հետեւողական կլինի օրինագծի ճակատագրին, իսկ հետագայում նաեւ կհետեւի, որպեսզի օրենքը կիրառվի հեռուստաընկերությունների կողմից:

«Հիմա ամեն ինչ կախված է Ազգային ժողովից. կընդունի՞ այս օրենքի նախագիծը, թե՞ոչ: Պետք է պարզենք՝ արդյոք ուզու՞մ ենք լսողության խնդիրներ ունեցող մարդկանց մեր քաղաքացիները համարել, թե՞ ուզում ենք նրանց մեկուսացնել»,- ասում է Սուրեն Դեհերյանը:

Նրա խոսքերով՝ լսողության խնդիրներ ունեցողները փորձում են շփում հաստատել մեզ հետ, ու քանի որ մեր լեզվով չեն կարող, մենք պետք է խոսենք նրանց հետ իրենց՝ ժեստերի լեզվով:

«Հեռուստատեսության եւ ռադիոյի մասին» ՀՀ օրենքում լրացում եւ փոփոխություն կատարելու օրենքի նախագիծը քննարկման կդրվի ԱԺ աշնանային նստաշարջանին, որը կմեկնարկի սեպտեմբեր ամսվա երկրորդ շաբաթից:

Մեկնաբանել

Media.am-ի ընթերցողների մեկնաբանությունները հրապարակվում են մոդերացիայից հետո: Կոչ ենք անում մեր ընթերցողներին անանուն մեկնաբանություններ չթողնել: Միշտ հաճելի է իմանալ, թե ում հետ ես խոսում:
 

Media.am-ը չի հրապարակի զրպարտություն, վիրավորանք, սպառնալիք, ատելություն, կանխակալ վերաբերմունք, անպարկեշտ բառեր եւ արտահայտություններ պարունակող մեկնաբանությունները կամ անընդունելի համարվող այլ բովանդակություն:
Լրացուցիչ տեղեկություններ ?