Հոկտեմբերի 24-ին կայացած կառավարության նիստի ժամանակ քաղաքաշինության կոմիտեի նախագահ Վահագն Վերմիշյանը հայտարարեց․ «Պետք է հարց տանք․ ի՞նչ երկիր ենք, ու՞մ համար ենք էս երկիրն ուզում՝ հնդիկների, պակիստանցիների, թե ինտելեկտուալ մարդկանց համար»։

Նիկոլ Փաշինյանը ընդհատեց Վերմիշյանին, նշելով․ «կոռեկտ արտահայտություն չեք անում»։ Վերմիշյանը ինքն իրեն շտկեց. «Այսինքն՝ ցածր կրթական ցենզ ունեցող մարդկանց, թե ինտելեկտուալների համար»։ Քննադատության ալիքից հետո նույն օրը Վերմիշյանը ներողություն խնդրեց այս արտահայտությունների համար։

Դեպքը սոցցանցերում Վերմիշյանի աշխատանքի շուրջ քննարկումների առիթ դարձավ։

Media.am-ը նույնպես վերհիշեց Վերմիշյանի՝ Կառավարության մեկ այլ նիստին արած հայտարարությունը այն մասին, որ նա «5 միլիոնից ավել շինություններ» է կառուցել։

Մենք ստուգեցինք Վերմիշյանի պնդումները և պարզեցինք, որ քաղաքաշինության կոմիտեի նախագահը ոչ հավաստի ձեռքբերումներ է ինքն իրեն վերագրել, իսկ ռուսական Օրյոլի շրջանի գլխավոր ճարտարապետի պաշտոնից հրաժարական է տվել դժգոհության և բողոքի ալիքից հետո։

Մոլորեցնող կենսագրություն

Մի քանի ամիս առաջ, երբ կառավարության նիստին քննարկվում էր Վերմիշյանի թեկնածությունը Քաղաքաշինության կոմիտեի ղեկավարի պաշտոնում, վարչապետը խնդրեց նրան ներկայանալ։ Վերմիշյանը հայտարարեց․ «Նախագծել և կառուցել եմ 5 միլիոնից ավել շինություններ տարբեր երկրներում, այդ թվում՝ օդանավակայան Դոմոդեդովո, Սոչիի ծովային նավահանգիստը, մեծ օբյեկտներ, քաղաքներ Սուդանում, Էրիթրեայում»։

Այս կենսագրության ավելի սեղմ տարբերակը ներկայացված է կառավարության կայքում։

Վերմիշյանի ինքնակենսագրականը մի քանի մոլորեցնող պնդումներ է պարունակում․

⛔ Վերմիշյանը չէր կարող 5 միլիոնից ավել շինություն նախագծել։ Սա չափազանց շատ է․ այս թիվը  նրա ապրած 55 տարվա վրա բաժանելիս ստացվում է օրական շուրջ 249 շինություն՝ ծնված օրվանից սկսած։

Հնարավոր է, որ ճարտարապետը նկատի ուներ 5 միլիոն քառակուսի մետր տարածք զբաղեցնող շինություններ, ինչի մասին նա ավելի վաղ էր խոսել։ Սակայն սա նույնպես տարօրինակ թիվ է։ 5 միլիոն քառակուսի մետրը հավասար է 5 քառակուսի կիլոմետրի։ Բայց Վերմիշյանը հայտարարել էր, որ քաղաքներ է նախագծել Սուդանում և Էրիթրեայում, իսկ դրա համար 5 քառակուսի կիլոմետրը չափազանց փոքր տարածք է․ համեմատության համար՝ Երևանի տարածքը 223 քառակուսի կիլոմետր է։

⛔ Ասելով, որ Սուդանում և Էրիթրեայում քաղաքներ է նախագծել, Վերմիշյանը չի պարզաբանում, որ այդ քաղաքները երբևէ չեն կառուցվել։ Դրանք նախագծային տարբերակ են եղել, որոնք կարելի է տեսնել Դավիթ Անդրեասյան անունով օգտատերի՝ Behance սոցիալական ցանցի էջում։ 

⛔ «Դոմոդեդովո» օդանավակայանի վերակառուցումը սկսվել է դեռ 2004-ին և տևել է մի քանի տարի։ Այդ ընթացքում օդանավակայանում աշխատանքներ են տարել բազմաթիվ մեծ ու փոքր ընկերություններ։ Սակայն Վերմիշյանի հարցազրույցներից բացի բաց աղբյուրներում գրեթե չկա տեղեկություն «Դոմոդեդովո» օդանավակայանի առաջին և երկրորդ տերմինալների վերակառուցման  աշխատանքներին նրա կամ նրա ղեկավարած Vek Project ընկերության մասնակցության մասին։ Media.am-ին հաջողվեց գտնել միայն մեկ հիշատակում։

Ըստ «Деловой авиационный портал» կայքի՝ երկրորդ տերմինալի կառուցապատողը «Экопроект-Плаз» ընկերությունն էր։ Նույն տեղեկությունն է հաղորդում նաև Sia.ru կայքը։

Գլխավոր ճարտարապետից դժգոհության ալիքը

Նախքան Հայաստանում պետական պաշտոն ստանձնելը Վերմիշյանը աշխատել էր նաև որպես Ռուսաստանի Օրյոլի շրջանի գլխավոր ճարտարապետ։

Այս պաշտոնը ստանձնելուց հետո Վերմիշյանը հայտարարել էր, որ հրաժարվել է իրեն հասանելիք սոցիալական արտոնություններից, որպեսզի այդ գումարը գնա կարիքավոր քաղաքացիներին։ «Орловские новости» պարբերականը նշում է, սակայն, որ որևէ արտոնություն Վերմիշյանին չէր հասնում։

Պաշտոնավարման ընթացքում նա հեղինակել էր Օրյոլ քաղաքի ամենահին փողոցներից մեկի վերակառուցման նախագիծը։ Վերմիշյանը հայտարարել էր, որ այդ փողոցը պետք է դառնար «աշխարհի ամենագեղեցիկ փողոցներից մեկը»։

Բայց վերակառուցումը նախատեսում էր պատմական սալահատակի ապամոնտաժում, ինչի դեմ քաղաքացիները բողոքի ակցիաներ անցկացրեցին, հաջորդ օրը բողոքի ակցիա անցկացրեցին տեղի քաղաքական գործիչները։ Change.org հարթակում հատնվեց Վերմիշյանի հրաժարականը պահանջող միջնորդություն։

Արդյունքում հին սալահատակը որոշեցին պահպանել, բայց վերակառուցումը իրականացվեց անորակ և նախնական նախագծին ոչ համապատասխան՝ առաջացնելով բողոքի և քննադատության ալիք։ Այստեղ կարելի է կարդալ քաղաքում ապրող բլոգերի պատմությունը փողոցի վերանորոգման ընթացքի մասին։

Երկու տարվա պաշտոնավարումից հետո՝ 2017-ին Վերմիշյանը հրաժարական տվեց։

Հայաստանում Վերմիշյանը կոնֆլիկտ ունեցավ գործող պաշտոնյաների հետ

Հրաժարականից հետո Վերմիշյանը վերադարձավ Հայաստան և նշանակվեց քաղաքապետ Տարոն Մարգարյանի խորհրդական։ Այնուհետև, 2019 թ․ մարտի 21-ին նա նշանակվեց քաղաքաշինության կոմիտեի ղեկավար։

Կարճ ժամանակ անց Վերմիշյանը կոնֆլիկտ ունեցավ այդ ժամանակ Ա․ Թամանյանի թանգարանի տնօրեն Ռուբեն Արևշատյանի հետ։ «[…] առաջին իսկ հանդիպումից հասկանալի դարձավ, որ կոմիտեի նախագահը, իմ առաջարկած թանգարանի զարգացման քաղաքականությանը հակադրեց կոշտ թայֆայականությունը», – հայտարարել էր Արևշատյանը։

Վերջինիս խոսքով՝ Վերմիշյանը նրան առաջարկել էր ընտրել իր և Կադաստրի կոմիտեի նախագահ Սարհատ Պետրոսյանի միջև․ «Իմանալով իմ ընկերական հարաբերությունները Սարհատ Պետրոսյանի հետ, որի հետ նա ի սկզբանե ուներ լարված հարաբերություններ, առաջարկեց ինձ ընտրել, թե որ կողմում եմ։ Ինչին ստացավ շատ կտրուկ պատասխան, որ ինձ նման հարցերով այլևս չդիմի»։

Հոկտեմբերի 18-ին Սարհատ Պետրոսյանը հայտարարեց իր հրաժարականի մասին։ Ուղիղ մեղադրանքներից խուսափելով, նա նշեց․ «Քաղաքաշինության բնագավառում մենք հետընթաց ունենք՝ հանձինս քաղաքաշինության կոմիտեի ներկա և նախկին ղեկավարների»։

Պետրոսյանը կրկնեց Ռուբեն Արևշատյանի՝ քաղաքաշինության կոմիտեի գործելաոճին տված որակավորումը․ «[լինելով] Մասնագիտությամբ ճարտարապետ-քաղաքաշինարար՝ այլևս չեմ կարող հանդուրժել դիլետանտիզմն ու կոռումպացվածության հասնող թայֆայականությունը»։

Կարինե Ղազարյան