«Թվապատում 2019» լրագրողական մրցույթ

15.03.2019, Հայտարարություն

Մեդիա նախաձեռնությունների կենտրոնը հայտարարում է «Թվապատում» լրագրողական 5-րդ մրցույթը՝ շարունակելով խթանել Հայաստանում իրականացվող փոփոխությունների լուսաբանումը: Նպատակն է խրախուսել որակյալ լրագրողական պատմությունների ստեղծումն ու տարածումը, ինչը նպաստում է հասարակության իրազեկման բարձրացմանը մարդու իրավունքների և 3 կոնկրետ ոլորտային ռեֆորմների վերաբերյալ:

«Թվապատում 2019. պատմություններ փոփոխությունների մասին» մրցույթին ներկայացված հայտերը պետք է համապատասխանեն հետևյալ թեմաներից որևէ մեկին`

  • հանրային սեկտորի թափանցիկություն ու հաշվետվողականություն, հակակոռուպցիոն քաղաքականություն և դրա կիրառումը,
  • տեղական ինքնակառավարում, համայնքների խոշորացում, համայնքային խնդիրները, առօրյան
  • սոցիալական բարեփոխումների ընթացքը, խնդիրները, կառավարության ծրագրերը և դրանց իրականացումը,
  • մարդու իրավունքների ոլորտը, իրավիճակը, ընկալումը, իրազեկվածությունը, խնդիրները, փոփոխությունները, ձեռքբերումները. դեպքեր, ճակատագրեր, փոքրամասնություններ, խոցելի խմբեր, կարծիքների բախում:

Լրագրողն իր պատմությունը ներկայացնում է առավել համապատասխան անվանակարգում:

Կազմակերպիչներն ակնկալում են, որ մրցույթին ներկայացված աշխատանքները վերոնշյալ թեմաներին համապատասխանելուց բացի աչքի կընկնեն համակողմանի լուսաբանմամբ, քննադատական և ստեղծագործական մոտեցումներով, կլինեն տեղեկատվական, բացատրական և բացահայտող։ Կգնահատվի նաև նյութի տեխնիկական որակը, ժամանակակից տեխնոլոգիաների կիրառումը, նորարար լուծումներն ու մոտեցումները։

Անվանակարգեր և մրցանակներ

Homo Agendi (Գործող անձ)

Նյութի առանցքում հերոսն է՝ իր անձնական նվաճումներով, ակտիվ քաղաքացիական դիրքորոշմամբ, միջավայրն ու իրավիճակը բարելավելու, մարդկանց օգնելու հնարավորությամբ ու փորձով:

Այս անվանակարգում կպարգևատրվեն թե՛ հաղթող նյութի հեղինակը, թե՛ հերոսը՝ յուրաքանչյուրը 300 000-ական դրամով:

Ռեինֆորմացիա. բարեփոխումների լավագույն լուսաբանում

Նյութերը պատմում են վերոնշյալ ոլորտներում իրականացվող փոփոխությունների էության, ընթացքի, խնդիրների և խոչընդոտների, հաջողությունների ու անհաջողությունների, այս գործընթացում ներգրավված կառավարության, հանրության, տարբեր կառույցների դերի, նրանց միջև համագործակցության հաջողված փորձերի, ինչպես նաև Հայաստանում մարդու իրավունքների թեմաներին առնչվող խնդիրների ու փորձի մասին:

Մրցանակը՝ 250 000 դրամ:

Դիտակ. հետաքննական լրագրություն

Նյութերը պատրաստված են լրագրողական հետաքննության ժանրում կամ պարունակում են լրագրողական հետաքննության տարրեր: Աշխատանքները գնահատելիս հաշվի կառնվեն քողարկված կամ անորոշ տեղեկատվության բացահայտումը, փաստերի ստուգումն ու ճշգրտումը, տվյալների լրագրության գործիքների օգտագործումը:

Մրցանակը՝ 250 000 դրամ:

Ստատուս․ մարդու իրավունքներ

Նյութերը պետք է անդրադառնան մարդու իրավունքներին: Խրախուսվում են առկա սուր խնդիրների բացահայտումը, իրավունքի մասին իրազեկող նյութերը, յուրահատուկ և անհայտ պատումները, մարդկային ճակատագրերի պատմությունները, իրավունքների պաշտպանության գործում արդյունավետ պայքարի օրինակները և այլն։

Մրցանակը՝ 250 000 դրամ:

Մեդիա 3.0․ տեխնոլոգիաների լավագույն կիրառում

Նյութերում օգտագործված են վիզուալացման տարբեր գործիքներ ու տեխնոլոգիաներ, ինչպիսիք են ինֆոգրաֆիկան, քարտեզն ու գծապատկերը, խաղային տարրերը, քրաուդսորսինգը, ինտերակտիվությունը և այլն:

Մրցանակը՝ 200 000 դրամ:

Ստուգված է. տեղեկությունների ստուգում

Նյութի առանցքում կեղծ կամ ոչ ճշգրիտ տեղեկությունների և փաստերի ստուգումն է՝ տարբեր ժամանակակից մեթոդների, գործիքների, բազաների կիրառմամբ: Այն հերքում կամ հաստատում է տարբեր պաշտոնյաների, կառույցների, կազմակերպությունների, լրատվամիջոցների, սոցցանցերի օգտատերերի կողմից տարածված կասկածելի ինֆորմացիան: Լրագրողական աշխատանքը պարունակում է հետաքննության տարրեր, անդրադառնում է հանրության համար կարևոր թեմաներին, իր բովանդակությամբ հակազդում է տարածված կեղծ կամ խեղաթյուրված տեղեկությանը:

Մրցանակը՝ 200 000 դրամ:

Հատուկ մրցանակ՝ մարդասիրական թեմաներով

Լրագրողական աշխատանքները կարող են լինել ցանկացած ժանրի և ձևաչափի, պետք է անդրադառնան Ղարաբաղյան կամ որևէ այլ հակամարտության հետևանքով առաջացած մարդասիրական խնդիրների: Ուշադրության կենտրոնում կարող են լինել, օրինակ, անհայտ կորածներ և նրանց հարազատներ, մարտական գործողություններին կամ շփման գծին մոտ ապրող քաղաքացիականներ, ականներից կամ պայթուցիկ այլ նյութերից տուժած անձինք, մարդասիրական աշխատանքներում ներգրավված մարդիկ, հակամարտության գոտում առկա այլ թեմաների և դրանց հետ կապված հերոսների պատմություններ։

Հաղթողն արժանանում է 200 000 դրամ խրախուսական դրամաշնորհի` հումանիտար մեկ այլ թեմայով աշխատանք իրականացնելու համար։

Ժամկետներ և պայմաններ

Նյութերը պետք է հրապարակված լինեն 2018 թ հուլիսի 30-ից  2019թ. հուլիսի 30-ը  ժամանակահատվածում հայաստանյան լրատվամիջոցներում՝ անկախ տեսակից (հեռուստաընկերություն, ռադիո, տպագիր, օնլայն) և ժանրից (լրատվական նյութ, հատուկ ռեպորտաժ, վերլուծական հոդված, հարցազրույց, լրագրողական հետաքննություն, հեղինակային սյունակ, վավերագրական ֆիլմ, ֆոտոռեպորտաժ, ժամանակակից մուլտիմեդիա ժանրեր և այլն):

Հեղինակը կարող է ներկայացնել առավելագույնը 3 նյութ (լրացնելով 3 տարբեր հայտ)՝ միևնույն կամ տարբեր անվանակարգերում: Մրցույթի կանոնակարգին կարող եք ծանոթանալ այստեղ:

Մասնակցելու համար անհրաժեշտ է լրացնել առցանց հայտը մինչև 2019 թ. հուլիսի 31-ը ներառյալ: Մրցանակաբաշխությունը տեղի կունենա սեպտեմբերին:

Հարցերի դեպքում կարող եք դիմել

Արեն Մանուկյանին, էլ. հասցե՝ [email protected], հեռ.՝ 010 583620 (ներքին՝ 112)

Սոնա Քոչարյանին, էլ. հասցե՝ [email protected], հեռ.՝ 010 583620 (ներքին՝ 126)

«Թվապատում» մրցույթը կազմակերպվում է Ամերիկայի ժողովրդի աջակցությամբ՝ ԱՄՆ Միջազգային զարգացման գործակալության միջոցով իրականացվող «Մեդիան քաղաքացիների տեղեկացված մասնակցության համար» ծրագրի շրջանակում: Այն իրականացնում է Մեդիա նախաձեռնությունների կենտրոնը: Միջոցառմանն աջակցում է Կարմիր խաչի միջազգային կոմիտեն:

Մեկնաբանել

Media.am-ի ընթերցողների մեկնաբանությունները հրապարակվում են մոդերացիայից հետո: Կոչ ենք անում մեր ընթերցողներին անանուն մեկնաբանություններ չթողնել: Միշտ հաճելի է իմանալ, թե ում հետ ես խոսում:
 

Media.am-ը չի հրապարակի զրպարտություն, վիրավորանք, սպառնալիք, ատելություն, կանխակալ վերաբերմունք, անպարկեշտ բառեր եւ արտահայտություններ պարունակող մեկնաբանությունները կամ անընդունելի համարվող այլ բովանդակություն:
Լրացուցիչ տեղեկություններ ?