«Առավոտ»-ի լրագրող Մելանյա Բարսեղյանի կարծիքով՝ մեդիա դաշտի ինքնակարգավորման գործիքը պետք է ունենա լայն տարածում: Այդ եզրակացությանն է նա հանգել սկանդինավյան երկրներ կատարած մեդիա տուրից հետո:

Հայաստանում գործող ԶԼՄ-ների էթիկայի Դիտորդ մարմինը դեռևս չունի նման տարածում:

«Դատարան դիմելու փոխարեն մարդիկ կարող էին դիմել Դիտորդ մարմնին»,- ասում է նա:

Մելանյան պատմում է դանիական փորձի մասին, երբ լրատվամիջոցները, որոնք անդամակցում են մեդիա խորհրդին, ստանում են հատուկ նշան: Եվ լսարանը միանգամից հասկանում է, թե ում տեղեկությունն է սպառում:

«Դանիայում ասում են, որ եթե լրատվամիջոցը չի միացել այդ մարմնին, ուրեմն լրատվամիջոց չէ»,- ասում է նա:

Մեծ դեր ունի նաև ամոթանքի կամ պարսավանքի պրակտիկան, որը թե՛ մոտիվացնող, թե՛ զսպող մեխանիզմ է: Ըստ Մելանյա Բարսեղյանի՝ այդ մեխանիզմը պիտի աշխատի նաև Հայաստանում: Պիտի լինեն խաղի կանոններ, իսկ լրատվամիջոցներն ու լսարանը իմանան, թե ով է հետևում այդ կանոններին, իսկ ով՝ ոչ:

Գեղամ Վարդանյան