Երեւանի մամուլի ակումբը (ԵՄԱ) հրապարակել է հեռարձակող մեդիաների՝ 2013 թվականի նախագահական ընտրությունների լուսաբանման մշտադիտարկման հաշվետվությունը, որն ընգրկում է 2013 թվականի հունվարի 21-ից փետրվարի 16-ն ընկած ժամանակահատվածը:

Մշտադիտարկման խնդիրն էր քանակական որակական տվյալների վերլուծության միջոցով պարզել եւ սահմանել. 

• ՀՀ նախագահական ընտրությունների նկատմամբ Հայաստանի հեռարձակող ԶԼՄ-ների ուշադրության աստիճանը
• Հեռարձակվող ԶԼՄ-ները որքան ազատ եւ անկողմնակալ են տեղեկություններ տրամադրել ընտրազանգվածին՝ ՀՀ նախագահի թեկնածուների մասին, ապահովել նրանց մուտքը եթեր՝ իրենց հայացքների, կարծիքների արտահայտման համար
• Հեռարձակվող ԶԼՄ-ները որքանով են կատարել նախընտրական քարոզչությունը կարգավորող օրենսդրության դրույթները
• Նախընտրական քարոզչության ժամանակաշրջանում հեռարձակվող ԶԼՄ-ների կողմից ընտրությունների լուսաբանումը որքանով է համապատասխանել ՀՀ միջազգային պարտավորություներին:

Քանակական դիտարկումը ներառում է հեռարձակվող ԶԼՄ-ների բուն նյութերի հաշվարկն ու չափումները:

Որակական դիտարկումն իրենից ներկայացնում է ստացած քանակական տվյալների վերլուծության եւ դիտարկման ժամանակահատվածում ԶԼՄ-ներում իրավիճակի գնահատման համադրում, որը հիմնվում է ԶԼՄ-ների, քաղաքական կուսակցությունների, քաղաքացիական հասարակության կազմակերպությունների եւ փորձագիտական հանրության ներկայացուցիների հետ հարցազրույցների, ինչպես նաեւ ԶԼՄ-ներում ընտրարշավի լուսաբանմանը նվիրված հրապարակումների վերլուծության, նախընտրական շրջանում ԶԼՄ-ների գործունեության վերաբերյալ կուսակցությունների ներկայացուցիչների եւ քաղաքական գործիչների հայտարարությունների ուսումնասիրման վրա:

Մոնիտորինգի համաձայն՝ պաշտոնական նախընտրական քարոզարշավի ժամանակ ամենաշատ ուշադրության արժանացել է «Ազգային ինքնորոշում» միավորման առաջնորդ Պարույր Հայրիկյանը, ինչն առաջին հերթին բացատվրում է հունվարի 31-ին նրա դեմ կատարված մահափորձի հետ կապված սպասողական վիճակով՝ արդյո՞ք նա կպահանջի հետաձգել ընտրությունները;

Հետազոտված 9 լրատվամիջոցների հատկացրած եթերաժամանակի ծավալով իրար մոտ էին գործող նախագահ Սերժ Սարգսյանի, «Ժառանգություն» կուսակցության առաջնորդ Րաֆֆի Հովհաննիսյանի եւ «Ազատություն» կուսակցության առաջնորդ Հրանտ Բագրատյանի ցուցանիշները:

Սերժ Սարգսյանի մոտ անդրադարձների բացասական հաշվեկշիռ է արձանագրվել «Երկիր Մեդիա» եւ «Կենտրոն» հեռուստաալիքներում, իսկ հետազոտված մյուս լրատվամիջոցներում նրա հաշվեկշիռը դրական է՝ բացառությամբ հ2-ի:

Րաֆֆի Հովհաննիսյանը, ով նախընտրական քարոզչության ողջ ընթացքում հիշատակվել է կա՛մ չեզոք, կա՛մ էլ դրական համատեքստում, բացասական անդրադարձներ ստացել է ընտրարշավի վերջին օրերին, երբ Վարդան Սեդրակյանը նրան մեղադրել է մասոնների հետ կապերի մեջ, որոնք էլ հենց, ըստ Սեդրակյանի, կազմակերպել են Պարույր Հայրիկյանի մահափորձը:

Վարդան Սեդրակյանն իր գրեթե բոլոր բացասական անդրադարձները վաստակել է հենց այդ վարկածը առաջ քաշելուց հետո: Նա միակ թեկնածուն է եղել, ում նկատմամբ անդրադարձները բացառապես բացասական են եղել:

Պարույր Հայրիկյանի (3) եւ Անդրաս Ղուկասյանի (6) պարագայում անդրադարձները բացառապես դրական էին:

Բոլոր թեկնածուներից միայն Արման Մելիքյանն է լուսաբանվել բացառապես չեզոք համատեքստում:

Երեւանի մամուլի ակումբի նախագահ Բորիս Նավասարդյանը լրատվամիջոցների կողմից խախտումներ է արձանագրել քվեարկության օրը:

«Որոշ տվյալներ վկայում են այն մասին, որ օրենքով նախատեսված նորմերը լռության օրվա ընթացքում եւ ընտրությունների ժամանակ ամբողջությամբ չեն պահպանվել: Մենք ունենք մի քանի օրինակներ, երբ եթեր է հեռարձակվել տարբեր թեկնածուների ծրագրերի կամ ընտրարշավի համեմատություն: Կային դեպքեր, երբ թեկնածուն ինքն իր համար ռեպորտաժով քարոզչություն էր անում, եւ արտասահմանյան լրատվամիջոցներից մեջբերումներ կային, երբ ընտրությունների արդյունքների կանխատեսում էր տեղի ունենում հենց ընտրության ժամանակ»,- ասում է ԵՄԱ նախագահը:

Աննա Բարսեղյան