Գրիգոր Ամալյան. «Լրատվամիջոցները հաջողել են պայմաններ ապահովել քաղաքական ուժերի համար»

19.04.2012, Նյուսրում

Լրագրող

Հեռուստատեսության եւ ռադիոյի ազգային հանձնաժողովը (ՀՌԱՀ) հրապարակել է մայիսի 6-ին կայանալիք Ազգային ժողովի ընտրությունների ընթացքում հեռուստատեսությունների եւ ռադիոների ապրիլի 8-ից 14-ը ընկած ժամանակահատվածի մոնիտորինգի արդյունքները

ՀՌԱՀ նախագահ Գրիգոր Ամալյանի գնահատմամբ՝ մոնիտորինգի ենթարկված մեդիաները, բացառությամբ մի քանիսի, հավասարակշիռ են լուսաբանել քաղաքական ուժերի նախընտրական քարոզարշավը՝ նրանց արտահայտվելու հնարավորություն ընձեռելով:

«Մեր լրատվամիջոցները հաջողել են պայմաններ ապահովել ընտրություններին մասնակցող թեկնածուների եւ քաղաքական ուժերի համար, եւ կարծում եմ, որ ուժերը իրենց ասելիքը հանրությանը մատուցելու համար եթերային ժամի լուրջ դեֆիցիտ չեն ունեցել. դրա վկայությունը կարող է հանդիսանալ նաեւ անվճար կարգով տրամադրվող եթերի ոչ լրիվ սպառումը»,- ասում է նա:

Այն հեռուստաընկերություններին, որոնց լուսաբանման մեջ ՀՌԱՀ-ը անհավասրաակշռություն է գրանցել, գրություն է ուղարկվել՝ մեկնաբանելու պահանջով եւ հետագա քարոզարշավի ընթացքում հավասարակշիռ լուսաբանելու զգուշացումով: Սակայն Գրիգոր Ամալյանի խոսքերով՝ մեդիաների կողմից անհասվարակշիռ լուսաբանումն ունի նաեւ իր օբյեկտիվ պատճառները:

«Քաղաքական ուժերը հաղորդումներին մասնակցելու հրավերն ընդունում կամ չեն ընդունում: Այն հեռուստածրագրերը, որտեղ նախատեսվում է որպես հյուր հրավիրել որեւէ քաղաքական ուժի ներկայացուցչի, արվում են հաջորդաբար, եւ ոմանց հերթը դեռեւս պիտի հասնի նախընտրական քարոզչության հաջորդ շրջանում: Անվճար տրամադրված չօգտագործված եթերաժամի համամասնությունը ցույց է տալիս, որ պատճառը կարող է լինել նաեւ առանձին վերցված քաղաքական ուժի քարոզչական ռազմավարությունը»,- ասում է ՀՌԱՀ նախագահը:

Այս փուլում հանձնաժողովը վարչական տույժեր չի կիրառել հեռուստաընկերությունների նկատմամբ, քանի որ նախընտրական քարոզչության շրջանը դեռեւս ավարտված չէ:

«Եթե նախընտրական քարոզչության ավարտին հանձնաժողովը իր ուսումնասիրություններով պարզի, որ հեռուստաընկերությունը քաղաքական ուժերի համար անհավասար պայմաններ է ստեղծել, ապա, միանշանակ, նրա դեմ կիրառվելու է վարչական տույժ»,- ասում է Գրիգոր Ամալյանը:

Վարչական տույժի են ենթարկվել միայն մարզային երկու հեռուստաընկերություններ՝ «Հրազդան»-ը ու Սպիտակի հեռուստաընկերությունը նախընտրական քարոզչության շրջանում իրենց գործունեության մասին հանձնաժողովին որեւէ տեղեկատվություն չտրամադրելու համար:

Աննա Բարսեղյան

Մեկնաբանել

Media.am-ի ընթերցողների մեկնաբանությունները հրապարակվում են մոդերացիայից հետո: Կոչ ենք անում մեր ընթերցողներին անանուն մեկնաբանություններ չթողնել: Միշտ հաճելի է իմանալ, թե ում հետ ես խոսում:
 

Media.am-ը չի հրապարակի զրպարտություն, վիրավորանք, սպառնալիք, ատելություն, կանխակալ վերաբերմունք, անպարկեշտ բառեր եւ արտահայտություններ պարունակող մեկնաբանությունները կամ անընդունելի համարվող այլ բովանդակություն:
Լրացուցիչ տեղեկություններ ?