2015.11.10,

Քննադատ

Ընտրությունների օր ԱՄՆ-ում. մեդիայի քննադատության թիրախը թեկնածուներից փոխվեց դեպի ընտրողները

author_posts/armen-sargsyan
Արմեն Սարգսյան
twiter

Լրագրող

Ամերիկյան առաջատար լրատվամիջոցների վերնագրերը ոչ թե ընտրությունների արդյունքների մասին էին, այլ ընտրողների անտարբերության

Նոյեմբերի 3-ին ԱՄՆ-ում տեղական ընտրություններ էին:

Երկրի մի քանի նահանգներ եւ բազմաթիվ խոշոր քաղաքներ ընտրում էին նահանգապետեր, քաղաքապետեր եւ քաղաքային խորհրդի անդամներ:

Ամերիկյան առաջատար լրատվամիջոցների վերնագրերը, սակայն, ոչ թե ընտրությունների արդյունքների մասին էին, այլ ընտրողների անտարբերության:

FoxNewsՏեղամասերը փակվեցին, ցածր մասնակցություն

WPԿարելի՞ է երիտասարդներին էժան խմիչքներով հրապուրել եւ բերել քվեարկության

BostonGlobeԸնտրողների մասնակցությունը Բոստոնում ավելի վատն էր, քան կարծում եք

Ընտրություններին մասնակցելու համար ԱՄՆ-ում քաղաքացիներն իրենք են գրանցվում, այլ կերպ ասած` խոսք են տալիս, որ կգան տեղամաս: Բայց, ինչպես լրատվամիջոցներն են նշում, «ամոթալի» է այն, որ նույնիսկ գրանցվածների շատ քիչ մասն է պահում խոստումը: Ընտրելու իրավունք ունեցողների, գրանցվածների եւ տեղամաս այցելողների թվերի մեջ սարուձորի տարբերություն կա:

Photo 1 Election in US

«Բոստոնի նորընտիր քաղաքային խորհուրդը թող չափավորի ցնծությունը, դեմոկրատիան, ճիշտ է, հաղթել է, բայց մի կերպ», գրում է «Բոստոն Գլոբ»-ը եւ շեշտում, որ գրանցվածների ընդամենը 10 տոկոսն է ընտրության եկել: Դա նշանակում է, որ շուրջ 645 հազար բնակչություն ունեցող Բոստոնում տեղական իշխանություն է ընտրել շուրջ 50 հազար մարդ:

«Ծիծաղե՞նք, թե՞ լաց լինենք»,- գրում է «Չիկագո Թրիբյուն»-ը եւ մասնակցության վերաբերյալ մեջբերում անում իր թղթակցի հաղորդագրությունից. «Մարդիկ ասում են, որ Ջասպերի շրջանում ընտրատեղամաս են եկել երկու ֆերմեր, երեք թեկնածու, երկու կով եւ մի գրպանահատ»:

Chicago_Tribune

Համատարած ցածր մասնակցության վիճակագրությունը կոտրեցին մի քանի քվեարկություններ իրենց բարձր ցուցանիշերով: Գաղտնիքն այն է, որ ընտրությունների օրը ամերիկյան հասարակությունը օգտագործում է տարբեր չափերի հանրաքվեներ անելու համար: Թեկնածուների անուններից բացի քվեաթերթիկի վրա տասնյակ այլ հարցեր կարող են լինել: Օրինակ՝

Համաձա՞յն եք, որ Յավապայ քոլեջի ֆինանսավորումը կրճատվի:

Համաձա՞յն եք, որ նահանգային հարկերը մնան նույնը:

Համաձա՞յն եք, որ Օք Բուլվարի տեղում խանութ կառուցվի:

Հենց այս տիպի հանրաքվեները հետաքրքիր դարձան թե՛ ընտրողների, թե՛ լրատվամիջոցների համար: Օրինակ՝ Հյուսթոնի ընտրություններում գրանցվեց մասնակցության այնպիսի բարձր ցուցանիշ, որ չէր եղել 2003 թվականից ի վեր: «Հյուսթոն Քրոնիքլ»-ը նույնիսկ հրապարակեց լեփ-լեցուն ընտրատեղամասի նկարը:

HoustonChronicle

Հյուսթոնում հանրաքվեի էր դրվել կանանց եւ տղամարդկանց զուգարանների տարբերությունը վերացնելու հարցը: Նույնասեռականների իրավունքների պաշտպանները ցանկանում էին, որ քաղաքն ունենա առանց հատուկ նշումների զուգարան, ընդհանուր թե՛ կանանց, թե՛ տղամարդկանց համար:

TreeAngle

Photo 2 Election in USԲողոք զուգարանների հավասարության դեմ «Ոչ մի տղամարդ կանանց զուգարանում»

Այ այստեղ #Houston հեշթեգը Թվիթերում նույնիսկ մի պահ առաջ անցավ ԱՄՆ ընտրությունների #ElectionDay հեշթեգից: Զուգարանների հարցը լուսաբանվեց, քննարկվեց ու վիճարկվեց ամբողջ լրատվական դաշտում: Նոյեմբերի 3-ին պարզ դարձավ, որ ընդհանուր զուգարանի հանրաքվեն բավականաչափ «այո» չի հավաքել: Կանայք ու տղամարդիկ առանձին կհոգան իրենց կարիքները:

Լրատվամիջոցների կողմից լայնորեն լուսաբանվեցին նաեւ այսպես կոչված «մարիխուանայի հանրաքվեները»: Օրինակ՝ Օհայո նահանգում քվեարկության էր դրվել 21-ից բարձր տարիքում մարիխուանա աճեցնելու եւ օգտագործելու հարցը՝ «Օհայոյի երրորդ ուղղումը»:

WP_2

Այս հարցին անդրադարձան բոլոր լրատվամիջոցները, պատվիրեցին իրենց հարցումները, արեցին սեփական կանխատեսումները այնքան, մինչեւ «կողմ»-ի ու «դեմ»-ի միջեւ գրեթե տարբերություն չմնաց: Վերջում, սակայն, առաջարկը հանրաքվեի միջոցով մերժվեց: Թե ովքեր ընտրվեցին Օհայոյի տեղական ինքնակառավարման մարմիններում, պետք է հատուկ փնտրել, իսկ այ մարիխուանայի հանրաքվեի մասին լուրերը հեղեղեցին մեդիան:

ԱՄՆ շատ նահանգներում ընտրողները տեղամաս են հասնում ոչ թե այս կամ այն թեկնածուի օգտին քվեարկելու համար, այլ հենց տեղական հանրաքվեներին մասնակցելու նպատակով: Հաճախ հանրաքվեի արդյունքները ամփոփում են հազարներով, իսկ բուն ընտրությունների արդյունքները մի քանի հարյուր ձայնով: Որպես հետգրություն ավելացնեմ, որ հազվագյուտ դեպքերում օգնում են նաեւ խաղաքարտերը:

Bradenton Herald

Բրեյդենտոն Բիչի քաղաքապետ Վիլիամ Շերոնն, օրինակ, քաղաքապետ դարձավ 195 ձայնով եւ մեկ տուզով: Քաղաքապետի երկու թեկնածուներն էլ հավասար ձայներ էին հավաքել՝ 195-195: Հանձնաժողովի նախագահը ճկուն շարժումներով խառնեց խաղաքարտերը, եւ տեսողության խնդիրներ ունեցող պարոն Շերոնը քաշեց տուզը: Նա հանձնաժողովի նիստի էր եկել իրեն ուղեկցող շան հետ: Երբ Բրեյդենտոն Բիչի արդեն վերընտրված քաղաքապետ Վիլիամ Շերոնին ասացին, որ տուզն է քաշել, նա նկատեց.

«Պատմություն կերտելու այնքան էլ լավ ձեւ չէ, բայց մենք կերտեցինք այն»:

Ամերիկյան լրատվամիջոցներն անդրադարձել էին նաեւ «մեկ թեկնածուով» քվեարկություններին: Համայնքային ղեկավար մարմիններում բազմաթիվ են եղել առանց մրցակիցների, մեկ թեկնածուով ընտրությունները: Ի տարբերություն Հայաստանի՝ նրանք ոչ միայն Հանրապետական կուսակցությւունից են եղել, այլեւ Դեմոկրատական:

Արմեն Սարգսյան

Սյունակում արտահայտված մտքերը պատկանում են հեղինակին եւ կարող են չհամընկնել media.am-ի տեսակետների հետ:


Մեկնաբանել

Media.am-ի ընթերցողների մեկնաբանությունները հրապարակվում են մոդերացիայից հետո: Կոչ ենք անում մեր ընթերցողներին անանուն մեկնաբանություններ չթողնել: Միշտ հաճելի է իմանալ, թե ում հետ ես խոսում:

Media.am-ը չի հրապարակի զրպարտություն, վիրավորանք, սպառնալիք, ատելություն, կանխակալ վերաբերմունք, անպարկեշտ բառեր եւ արտահայտություններ պարունակող մեկնաբանությունները կամ անընդունելի համարվող այլ բովանդակություն:

Leave a Reply

Your email address will not be published. Required fields are marked *