2013.03.21,

Նյուսրում

Վանաձորում շարունակվում է news.am-ի դեմ դատական հայցը

Վանաձորի բնակչուհի Մարիամ Եփրեմյանը հրաժարվել է տեղական «Միգ»  հեռուստաընկերության դեմ ներկայացրած դատական հայցից, իսկ News.am-ի դեմ հայցը դեռ վարույթում է:

Մարիամ Եփրեմյանը հայցադիմում էր ներկայացրել «Միգ»-ի եւ News.am-ի դեմ 2012թ.-ի մարտ ամսին վրաերթի հետևանքով ամուսնու մահվան մասին պատմող` Youtube-ում տեղադրված տեսանյութերի համար: Նրան հատկապես վրդովեցրել էին մահացած ամուսնու մարմինը ցուցադրող կադրերը:

Կինը դատարանից պահանջում է պարտավորեցնել լրատվամիջոցներին համացանցից հանել տեսանյութերը եւ յուրաքանչյուրից բռնագանձել 500 հազար դրամ, ինչպես նաեւ փոխհատուցել դատական ծախսերը:

Վերջին դատական նիստում Մարիամ Եփրեմյանը հրաժարվել է «Միգի»  դեմ հայցից: Նա  հրաժարվեց մեկնաբանել իր որոշումը:

«Միգ» հեռուստաընկերության տնօրեն Սամվել Հարությունյանը պատմեց, որ զրուցել է Մարիամ Եփրեմյանի հետ: Նա տեղեկացրել է, որ իրենք արդեն youtube-ից հեռացրել են դատական վեճի պատճառ հանդիսացող տեսանյութը:

«Միմյանց հասկացանք, ու ամեն բան պարզ դարձավ բոլորիս համար»,- ասում է «Միգ»-ի տնօրենը: Նրա տպավորությամբ Մարիամ Եփրեմյանը հասկացել է, որ հեռուստաընկերությունը իրեն կանխամտածված ցավ չի պատճառել:

News.am-ի դեմ դատավարությունը շարունակվում է: Youtube-ում նաև պահպանվում է ավտովթարի մասին պատմող` news.am-ի կողմից տեղադրված տեսանյութը:

Դատարանում News.am ՍՊԸ-ի շահերը ներկայացնող փաստաբան Արամազդ Կիվիրյանն ասում է, որ հայցվոր կողմը հաշտության որևէ տարբերակ իրենց չի առաջարկել:

Կիվիրյանն ինքն է լրատվամիջոցի անունից զանգահարել Մարիամ Եփրեմյանին` փորձելով ճշտել նրա դիրքորոշումը և առաջարկություն արել հնարավոր բանակցության շուրջ:

«Եթե նա ամբողջ խնդիրը տեսնում է նյութի մեջ, ապա մենք կարող ենք նաև հանել նյութը, եթե դա ինչ-որ ձևով իր վրա ազդում է` այսպես ասած: Բայց մերժում ստացանք, քանի որ տիկին Եփրեմյանը պահանջում էր նաև փոխհատուցում պարտադիր կարգով: Ասում էր` ինձ պետք չէ հանել, ինձ պետք է նաև իմ գումարային փոխհատուցումը»,- ասում է Արամազդ Կիվիրյանը:

Փաստաբանի կարծիքով տեսանյութը որևէ ձևով չի վարկաբեկում Եփրեմյանների ընտանիքին: Հրապարակման նպատակն է եղել ցույց տալ վրաերթ կատարած անձի գործողությունները:

Տեղեկատվական վեճերի խորհուրդը այս դեպքի կապակցությամբ եզրակացության մեջ նշել է, որ Մարիամ Եփրեմյանը բաց է թողել դատարան դիմելու վաղեմության ժամկետը:

Եզրակացության մեջ նաեւ նշվում է, որ «դժբախտ պատահարի, հանցագործության կամ ինքնասպանության արդյունքում զոհված անձի դիակի լուսանկարը կամ տեսապատկերը հրապարակելը լրատվության միջոցներով զոհվածի հարազատների անձնական և ընտանեկան կյանքի իրավունքի կոպիտ միջամտություն է, որն անհրաժեշտ չէ ժողովրդավարական հասարակությունում»:

Ադրինե Թորոսյան, Վանաձոր


Մեկնաբանել

Media.am-ի ընթերցողների մեկնաբանությունները հրապարակվում են մոդերացիայից հետո: Կոչ ենք անում մեր ընթերցողներին անանուն մեկնաբանություններ չթողնել: Միշտ հաճելի է իմանալ, թե ում հետ ես խոսում:

Media.am-ը չի հրապարակի զրպարտություն, վիրավորանք, սպառնալիք, ատելություն, կանխակալ վերաբերմունք, անպարկեշտ բառեր եւ արտահայտություններ պարունակող մեկնաբանությունները կամ անընդունելի համարվող այլ բովանդակություն:

Leave a Reply

Your email address will not be published. Required fields are marked *