Մեդիա նախաձեռնությունների կենտրոնը սկսում է լրագրողների անվտանգությանը նվիրված դասընթացների շարք։ Դասընթացների նպատակն է լրագրողներին զինել անհրաժեշտ գիտելիքով ու հմտություններով՝ պատերազմական և արտակարգ իրավիճակներում աշխատելու, վտանգավոր իրադարձություններ լուսաբանելիս իրենց աշխատանքը հնարավորինս անվտանգ ու ապահով կազմակերպելու համար:

Շարքը կազմված է 3-4 օր տևողությամբ երեք դասընթացից՝

• Ֆիզիկական անվտանգություն,
• թվային կամ տեղեկատվական անվտանգության,
• հոգեբանական տրավմայի հաղթահարում:

Առաջին դասընթացը ՝ «Լրագրողների ֆիզիկական անվտանգությունը պատերազմական և արտակարգ իրավիճակներում», կանցկացվի 2017թ հունվարի 24-26-ին` 10:00-18:30 (հասցե՝ Մեդիա նախաձեռնությունների կենտրոն, Արշակունյաց 3, Երևան): Դասընթացը վարելու է մեդիա անվտանգության մասնագետ Սթիվեն Քուքը (TYR solutions, Մեծ Բրիտանիա)՝ հայերեն թարգմանությամբ: Սթիվենը ոչ միայն տարիներ շարունակ վերապատրաստել է լրագրողների, այլև տարբեր լրատվամիջոցների թիմերի հետ անմիջականորեն աշխատել է աշխարհի ամենավտանգավոր ու թեժ կետերում: Նախկինում ծառայություն է անցել բրիտանական բանակում և ոստիկանությունում:

Եռօրյա դասընթացի ժամանակ մասնակիցները կծանոթանան

• Վտանգավոր իրավիճակների լուսաբանման նախապատրաստության, պլանավորման, ռիսկերի գնահատման մեթոդներին,
• պատերազմական, կոնֆլիկտային, արտակարգ իրավիճակներում անվտանգության պահպանման սկզբունքներին,
• զենքերի ու հատուկ միջոցների առանձնահատկություններին, հետևանքներին ու դրանցից խուսափելու հնարքներին,
• բազմամարդ բախումների, թիրախավորված հետապնդումների, հարձակումների վտանգներին, մեխանիզմներին ու նման դեպքերում լրագրողի անելիքին,
• առաջին օգնության հմտություններին:

Ձեւավորվելու է առավելագույնը 15 մասնակցից բաղկացած թիմ, որը կմասնակցի բոլոր երեք դասընթացներին։

Դասընթացների մասնակիցների ընտրությունը մրցակցային է։ Հաշվի են առնվելու մասնակիցների աշխատանքային կենսագրությունը՝ այդ թվում, պատերազմական և այլ արտակարգ իրավիճակներ լուսաբանելու փորձը, ինչպես նաև պատրաստակամությունը մասնակցելու ամբողջ դասընթացաշարին։

Դիմել կարող են լրատվամիջոցներում աշխատող և ազատ (free-lance) լրագրողները, օպերատորները, ֆոտոլրագրողները: Անհրաժեշտ է մինչև հունվարի 18-ը [email protected] էլ փոստի հասցեին ուղարկել ինքնակենսագրություն (ներառյալ կոնտակտային տվյալները) և համառոտ բացատրություն (100-200 բառ), թե ինչու է կարևոր ձեր մասնակցությունը դասընթացներին՝ նշելով նաև նախկինում վտանգավոր իրավիճակներում աշխատելու փորձը, եթե այդպիսին կա:

Լրացուցիչ հարցերի դեպքում գրել [email protected] էլ փոստի հասցեին կամ զանգել 010583620: