Մայիսի 6-ի ընտրությունների օրը «Ազատության» լրագրողի դեմ բռնարարքի գործը կարճվել է

Մայիսի 6-ի ընտրությունների օրը «Ազատության» լրագրողի դեմ բռնարարքի գործը կարճվել է
Էլինա Չիլինգարյան

Ոստիկանությունը կարճել է «Ազատություն» ռադիոկայանի լրագրող Էլինա Չիլինգարյանի մասնագիտական գործունեությունը խոչընդոտող քրեական գործի վարույթը՝ հանցակազմի բացակայության հիմքով:

Մայիսի 6-ի Ազգային ժողովի ընտրությունների լուսաբանման ընթացքում լրագրողի ձեռքից փորձել էին հափշտակել տեսախցիկն ու կոտրել հիշողության սարքը՝ այդ ընթացքում երկու անգամ հարվածելով նրա ձեռքին:

«Հիմնական փաստարկներն այն են, որ տեսանյութում չի երեւում, որ ինձ խփում են, եւ որ ինձ վրա ոչ մի բեյջ չի եղել, հետեւաբար այդ տղան չի իմացել, որ լրագրող եմ: Բայց ես ընտրատեղամասի ներսում չէի, որ բեյսջս վրաս լիներ: Բացի այդ՝ ոստիկանությունը տեսանյութի որեւէ այլ մասնակից չի գտել եւ չի հարցաքննել, այդ թվում՝ նաեւ երիտասարդի հետ կանգնածներին»,- ասում է Էլինա Չիլինգարյանը: 

Գործը կարճելու մասին որոշման մեջ նշվում է. «Էլինա Չիլինգարյանը տեսանկարահանումներ կատարելիս չի ներկայացել որպես լրագրող, լրագրողին հատուկ տարբերիչ նշան չի կրել, նրա օգտագործած տեսախցիկը նույնպես տարբերանշան չի ունեցել:

Նման պայմաններում նախաքննությամբ ձեռք բերված ապացույցներն իրենց համակցության մեջ գնահատելով՝ հիմնավորված պետք է համարել, որ Հ.Համբարձումյանը չի գիտակցել եւ պարտավոր չէր գիտակցել, որ Էլինա Չիլինգարյանը լրագրող է եւ իրականացնում է մասնագիտական գործունեություն:

Հ.Համբարձումյանի դիտավորությունն ուղղված չի եղել Չիլինգարյանին ծեծելուն, մարմնական վնասվածք կամ ֆիզիկական ցավ պատճառելուն: Նկարահանվելուց խուսափելու նպատակով նա հարվածել է նկարահանողի ձեռքին, որի հետեւանքով տեսախցիկն ընկել է գետնին:

Երկրորդ անձի կողմից ձեռքին հարվածելու վերաբերյալ ցուցմունք է տվել միայն Էլինա Չիլինգարյանը: Այդ դրվագով այլ ապացույց ձեռք չի բերվել, այսինքն՝ չի հաստատվել հանցագործության դեպքը»:

Լրագրողը չի պատրաստվում բողոքարկել ոստիկանության որոշումը:

«Եթե գոնե մի փոքր հույս ունենայի, որ բողոքարկելս արդյունք կտա եւ մի բան կփոխվի, կանեի: Ես վստահ եմ, որ որեւէ փոփոխություն չի լինի: Նպատակս էլ այն չէ, որ այդ տղան գնա մի քանի տարի անցկացնի բանտում»,- ասում է Էլինա Չիլինգարյանը:

«Ազատ Եվրոպա/Ազատություն» ռադիոկայանի հայկական ծառայության տնօրեն Հրայր Թամրազյանի կարծիքով՝ ոստիկանությունը կարող էր շարունակել հետաքննությունը, քանի որ երիտասարդը ակնհայտորեն խախտել է օրենքը:

«Այդ երիտասարդը խոչընդոտել է լրագրողի աշխատանքը: Եվ դա որեւէ իրավական հետեւանք պետք է ունենար, երիտասարդը գոնե ինչ-որ վարչական տույժի պետք է ենթարկվեր: Բայց գուցե ոստիկանությունն ավելին գիտի, քան մենք»,- ասում է նա:

Հրայր Թամրազյանը նույնպես բողոքարկելուց փոփոխություն չի ակնկալում:

«Մենք կարող ենք բողոքարկել, բայց կարծում ենք՝ նույն արդյունքը կլինի: Բացի այդ՝ դատական գործընթացները եւ՛ ժամանակ են խլում, եւ՛ էներգիա: Այնպես որ չենք ուզում ներքաշվել դատական քաշքշուկների մեջ: Ամեն դեպքում հույս ունեմ, որ հաջորդ ընտրություններին նման միջադեպեր չեն կրկնվի»,- ասում է Թամրազյանը:

Ազգային ժողովի ընտրությունների օրը լուսաբանելու ընթացքում խոչընդոտվել է եւս մի քանի լրագրողների մասնագիտական գործունեությունը: Խոսքի ազատության պաշտպանության կոմիտեն արձանագրել է լրագրողի գործունեությունը խոչընդոտելու 4 դեպք, որից երկուսը՝ ֆիզիկական բռնության զուգորդմամբ:

 Աննա Բարսեղյան

Comments

լավ նախադեպ չի, հաստատ

լավ նախադեպ չի, հաստատ

Փաստորեն, կարելի է օրը

Փաստորեն, կարելի է օրը ցերեկով մոտենալ ցանկացած մեկին, փորձել, ասենք, ջարդել անծանոթ մարդու հեռախոսը կամ տեսախցիկն ու մնալ անպատիժ...

Մեկնաբանել

Type the characters you see in this picture. (verify using audio)
Type the characters you see in the picture above; if you can't read them, submit the form and a new image will be generated. Not case sensitive.
                                

 Media.am by Media Initiatives Center is licensed under a Creative Commons Attribution 3.0 Unported License
Reproduction in whole or in part without reference is prohibited.

Creative Commons License